Shmangia tatimore – Një pakt i ri ndërkombëtar për të luftuar abuzimet e kompanive
Rreth 70 vende kanë nisur gjatë javës një konventë të re mbi taksat ndërkombëtare për të parandaluar shmangiet tatimore nga kompanitë shumëkombëshe. Ministra nga ekonomi të mëdha nënshkruan paktin e ri tatimor në Organizatën për Bashkëpunim dhe Zhvillim Ekonomik në Paris dhe thanë se më shumë vende mund të bashkohen në javët që vijnë.
Marrëveshja e re do të zëvendësojë më shumë se 1,100 traktate dypalëshe tatimore, apo rreth 1/3-ën e traktateve të nënshkruara nga vendet në shekullin e fundit, për të shmangur tatimin e dyfishtë. Në epokën e globalizimit, kompanitë shumëkombëshe kanë shtuar numrin e transaksioneve përtej kufijve drejt vendeve të treta, vetëm për të përfituar nga taksat e ulëta të këtyre vendeve.
Traktati i ri shënon standarde minimale për të shmangur abuzimet dhe përcakton prezencën tatimore të një kompanie në një vend, ndërkohë që cakton plane për zgjidhjen e mosmarrëveshjes së tatimit të dyfishtë mes Qeverive. Një mungesë e dukshme në takim ishin Shtetet e Bashkuara, që treguan pak interes për traktatin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.