Shoqata Ndërkombëtare e Transportit Publik – Anëtarësohet Bashkia e Tiranës, do paguajë 2500 euro në vit

Bashkia e Tiranës do të anëtarësohet në Shoqatën Ndërkombëtare të Transportit Publik, ndërkohë që kuota vjetore që do të paguajë është 2500 euro.

Efektet financiare do të përballohen nga buxheti i miratuar çdo vit,  ndërsa për vitin 2017 do të paguhet nga fondi i aparatit të bashkisë në programin e Administratës Vendore për kuota anëtarësie.

Anëtarësimi në këtë shoqatë i jep mundësi anëtarëve të saj të shkëmbejnë njohuri dhe eksperienca të ndryshme nga vendet që përfaqësojnë, duke i ofruar ekspertë të dedikuar për zhvillimin dhe zgjidhjen e transportit publik.

Gjithashtu, krijon mundësi të forcimit të partneritetit për qasje ndaj financimit evropian të bashkëpunimit ndërkombëtar si dhe pjesëmarrje në projekte, që financohen nga palët e treta.

Shoqata Ndërkombëtare e Transportit Publik është e njohur për punën e saj në avancimin e zhvillimit të transportit publik të udhëtarëve me autobus, hekurudhor rajonal dhe periferik, metro të lehta dhe tramvaj.

Sot, kjo shoqatë përfaqësohet nga 1400 kompani anëtare, duke i dhënë akses në mbi 18 mijë kontakte nga fushat e mobilitetit urban, lokal, rajonal dhe ndërkombëtar nga më shumë se 96 vende në të gjithë botën.

Ajo ka si qëllim të përmirësojë cilësinë e jetës dhe të mirëqenies ekonomike, duke mbështetur, zhvilluar dhe promovuar transportin publik të qëndrueshëm.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.