Shpallet tenderi/ Tërmeti vë në pikëpyetje sigurinë e Kuvendit! Rivlerësim për dy godinat e ndërtuara në vitet ‘50
Dy godinat e Kuvendit do të kalojnë në “sitën” e vlerësimit sizmik, sipas tenderit të shpallur në Agjencinë e Prokurimit Publik. Një fond prej 9 milionë lekësh është vënë në dispozicion për projektin e riaftësimit të Kuvendit.
“Kjo ndërhyrje del e domosdoshme sepse është objekt i projektuar në vitet 1952-1954 dhe ndërtuar në vitet 1956-1960. Siç shihet mosha e tij është 60 vjeçare. Normativa europiane kërkon që të bëhet vlerësim sizmik i godinave që kanë kaluar moshën 50 vjeçare” specifikohet më tej në dokumentacionin bashkangjitur tenderit.
Sipas detajeve të tenderit, goditja e tërmetit e 26 nëntorit e ka tejkaluar vlerën e tërmetit për të cilën llogariteshin godinat, referuar kodit të viteve 1960. Ndër të tjera, forma e tij kërkon që të ndërhyhet në strukturën konstruktive të tij për ta ndarë atë në forma më të thjeshta, në mënyrë që struktura të punojë më mirë në reagimin sizmik.
Tenderi i shpallur në Agjencinë e Prokurimit Publik do të qëndrojë i hapur deri më 12 nëntor, për aplikantët e interesuar.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.