Shpenzimet e gjyqeve falas për ata që kanë më pak se 500 mijë lekë të ardhura! Por duhen kthyer nëse gjendja ekonomike përmirësohet në 2 vite
Projektligji i ri për ndihmën juridike zgjeron kategoritë që e përfitojnë falas këtë ndihmë. Referuar projektligjit, për të përfituar nga shërbimet e ndihmës juridike personat duhet të plotësojnë njëkohësisht kriteret e mëposhtme:
-të kenë një çështje civile ose administrative
-Të ardhurat mujore të personit të jenë nën pagën minimale, ose personi nuk është në marrëdhënie pune ose është ne pension
-Të ardhurat totale të familjes nuk kalojnë më shumë se 500 000 lekë në vit
-personi dhe familja që kërkon shërbimin ligjor nuk disponon pasuri të tjera përvec banesës në të cilën jetojnë
-si dhe çdo rrethanë tjetër që e vendos personin në kushte pamundësie, për të siguruar privatisht një nga shërbimet e ndihmës juridike
Kategoria e subjekteve të cilët kërkojnë të përfitojnë nga shërbimet e ndihmës juridike, e përfitojnë atë pa kërkuar plotësimin e kritereve, janë:
-Personat që janë në skemën e ndihmës ekonomike ose të skemave të tjera shoqërore që përfitojnë ndihmë financiare për shkak të pamundësisë fizike dhe/ose mendore sipas legjislacionit në fuqi;
-Viktimat e një vepre penale, të cilët kërkojnë të kompensohen nëpërmjet një padie civile në procesin penal ose në një proces civil;
-Të miturit të cilët janë viktima të një vepre penale, ose për cdo rast tjetër kur jetojnë në institucione të përkujdesit shoqërorë;
-Viktimat e trafikimit të qenieve njerëzore;
-Viktimat e dhunës në familje;
-Personit të cilit i është cenuar e drejta nëpërmjet një veprimi ose mosveprimi që përbën diskriminim sipas legjislacionit për mbrojtjen nga diskriminimi;
-Personi i cili qëndron në një institucion të mbyllur për shkak të gjëndjes së tij shëndetësore mendore që është i braktisur nga familja, sipas parashikimeve të ligjit “për shëndetin mendor në RSH”.
Por ligji i ri parashikon edhe rastet kur shpenzimet për procedurat gjyqësore mund të rikthehen, pra të paguhen më vonë.
Në nenin 22 parashikohen rastet e kthimit të shpenzimeve për ndihmën juridike të dhënë
Detyrimin për të kthyer shpenzimet e kanë personat që kanë përfituar ndihmë juridike falas, duke paraqitur të dhëna të rreme ose të pavërteta, përfshirë edhe të dhënat për gjendjen e tij financiare.
Po ashtu, edhe personi, i cili ka detyrimin dhe nuk vërteton plotësimin e kritereve specifike për të përfituar shërbimet e ndihmës juridike është i detyruar të kthejë të gjitha shpenzimet e kryera për ofrimin e kësaj ndihme.
Ndërkohë, nëse gjendja financiare e personit përmirësohet së tepërmi brenda një afati prej 2 vjetësh, ai është gjithashtu i detyruar të njoftojë për këtë Drejtorinë e Ndihmës Juridike sa më parë të jetë e mundur.
“Në situatat kur përmirësimi i ndjeshëm i gjendjes materiale i kërkuesit gjithsesi nuk i lejon qe te përballojë tërësisht kostot e procesit ose te përmbarimit për te cilat i është akorduar ndihmë juridike, sasia e ndihmës juridike do të modifikohet duke u zvogëluar në nivelin e domosdoshëm të kërkuesit me qëllim mos rrezikimin e mbajtjes së tij dhe të familjes” përcaktohet në projektligj.
Drejtoria e Ndihmës juridike në rastet kur evidenton ose njoftohet nga personi që ka përfituar ndihmën juridike, se situata e këtij të fundit është përmirësuar vë në lëvizje nëpërmjet kërkesës, gjykatën që ka dhënë vendimin për dhënien e ndihmës juridike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.