Shpenzimet e universiteteve 2019-2020. Qëndresa Qytetare: “1.7 milionë euro vetëm për sigurinë e godinave”

Pavarësisht goditjes së ekonomisë së shkaktuar nga tërmeti dhe pandemia, gjatë vitit akademik 2019 – 2020 universitetet në vendin tonë kanë vijuar  me shpenzimet miliona euroshe. Sipas Raportit të publikuar nga Qëndresa Qytetare 6 universitete të marra në studim  shpenzuan gjatë kësaj periudhe  1.7 milion euro për sigurinë e godinave dhe 650 000 euro për orendi zyre. Sipas raportit, zyrtarët e Universitetit të Tiranës janë shpërblyer me rreth 1.7 milion euro honorare, ndërsa ata të UPT kanë shpenzuar 106 000 euro për dieta dhe udhëtime.

Ajo që nënvizohet është se për zërin e studimeve dhe kërkimit shkencor nuk ka pasur asnjë financim shtesë, të 6 universitetet  kanë shpenzuar gjithsej 0.1% të shpenzimeve totale për këtë zë. 95% e studentëve të marrë në pyetje shprehen se nuk kanë akses për printime në kancelaritë pranë universitetit, ndërsa për digjitalizimin e shërbimeve administrative ndaj studentëve dhe rimbursimin e paketave të internetit nuk ka pasur asnjë investim. universiteti që ka shpenzuar më shumë është ai i Tiranës me 530 000 euro për sigurinë e godinave në një vit akademik, ndjekur nga Universiteti i Elbasanit me 400 000 euro dhe Universiteti Politeknik i Tiranës me 300 000 euro pagesa për sigurinë .

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.