Shpenzimet kapitale, qeveria investoi 30% të fondit në muajin dhjetor
Shpenzimet kapitale janë realizuar në masën 97 % deri në fund të dhjetorit 2016 duke realizuar pak a shumë të gjithë pritshëmritë për fondin e përcaktuar në buxhet sipas aktit normativ të ndryshuar.
Viti i kaluar është shfaqur me të njëjtën tendencë të 2015-ës ku kemi parë një qëndrim konservator për investimet publike duke bërë që të paktën 70 për qind e tyre të ndahen në 11 muaj dhe vetëm në dhjetor të shpenzohet 30 për qind e fondit total.
Kështu sipas treguesve fiskalë vlera e shpenzimeve kapitale në fund të dhjetorit shënoi nivelin rreth 57 miliardë lekë nga 58.6 miliardë të parashikuara.
Deri në muajin nëntor për investime kanë shkuar 39 miliardë lekë ndërkohë që vetëm në dhjetor janë shpenzuar 17.6 miliardë lekë, pra rreth 30 për qind e fondit total.
Kontrolli i vazhdueshëm mbi investimet ka ardhur si efekt i kontrollit të deficitit nga ana e qeverisë ndërkohë që Banka e Shqipërisë por edhe Fondi Monetar Ndërkombëtar kanë sugjeruar herë pas herë në daljet e tyre njëtrajtësim të shpenzimeve përgjatë vitit.
Kjo lidhet me faktin që investimet publike konsiderohen si një nga motorët e ekonomisë në kushtet kur investimet private kanë qenë të kushtëzuara.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.