Shpenzimet në Kërkim dhe Zhvillim – Në 2.03% ndaj PBB, Europa mbetet pas ekonomive të mëdha

Vendet anëtare të Bashkimit Europian kanë shpenzuar rreth 300 miliardë euro në Kërkim dhe Zhvillim (R&D) për 2016-ën.  Raporti i Shpenzimeve në Kërkim dhe Zhvillim ndaj Produktit të Brendshëm Bruto ka mbetur i qëndrueshëm në 2.03%,  krahasuar me 1.76% që ishte 10 vite më parë.

Megjithatë, krahasuar me ekonomitë e tjera të mëdha, përqindja e investimeve në këtë fushë e lë pas Europën krahasuar me Korenë e Jugut, në 4.23%, me Japoninë në 3.29% dhe Shtetet e Bashkuara me 2.79%. Me Kinën shifra është thuajse e ngjashme, ndërsa krahasuar me Rusinë dhe Turqinë, shpenzimet në Europë janë më të larta.

Në mënyrë që të ofrohen stimuj ndaj konkurrueshmërisë së BE, rritja e shpenzimeve në R&D në raport me PBB, pritet në 3% deri në fund të dekadës, pasi është një nga 5 objektivat kryesorë të strategjisë “Europa 2020”.

Sektori i firmave vazhdon të jetë shpenzuesi kryesor në Kërkim dhe Zhvillim, duke zënë 65% të totalit në 2016-ën, ndjekur nga sektori i edukimit të lartë me 23%, sektorit qeveritar me 11% dhe sektori privat jo-fitimprurës me 1%.

Brenda vendeve të Bashkimit Europian, shpenzimet më të mëdha në kërkim dhe zhvillim në përqindje ndaj PBB, janë regjistruar në Suedi dhe Austri, me 3.25% dhe 3.09%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.