Shpenzimet për paga – U rritën në shumicën e sektorëve
Bizneset rritën shpenzimet për fondin e pagave në tremujorin e dytë të vitit në shumicën e sektorëve ekonomikë, çka dëshmon vijimësinë e ecurisë pozitive të tregut të punës. Rritja e fondit të pagave përgjithësisht është më e lartë se rritja e numrit të të punësuarve, çka nënkupton një rritje të pagës mesatare. Ecurinë më pozitive në kuptimin e rritjes së fondit të pagave e raportuan industria përpunuese dhe hoteleria.
Në industrinë përpunuese, fondi i pagave u rrit me 18.7%, duke iu bashkangjitur edhe treguesve pozitivë të shitjeve dhe punësimit për të njëjtin tremujor. Edhe industria nxjerrëse ndodhet në një cikël pozitiv, falë çmimeve të përmirësuara të lëndëve të para. Indeksi i fondit të pagave në këtë degë u rrit me 8.1% krahasuar me tremujorin e mëparshëm.
Mesatarisht, fondi i pagave në sektorin e industrisë u rrit me 15.9%, me kontributin të konsiderueshëm edhe të sektorit energjetik. Edhe ndërtimi regjistroi rritje të fondit të pagave me 9%, megjithëse në tremujorin e dytë sektori raportoi rënie vjetore të shitjeve. Për sa i takon shërbimeve, ecurinë më pozitive e shfaqën degët e lidhura me turizmin dhe sidomos hoteleria, ku fondi i pagave u rrit me 15.5%. Edhe dega me peshën kryesore në shërbime, tregtia, raportoi rritje vjetore të fondit të pagave me 6.6%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.