Shpenzimet për paketat sociale – Ndihma shtetërore anti-covid/Për 8 muaj janë disbursuar 12 miliardë lekë
Rreth 12 mld lekë janë shpenzuar nga buxheti i shtetit për paketën sociale anti-covid, sipas treguesve fiskalë të Ministrisë së Ekonomisë dhe Financave. Fondi është disbursuar për periudhën prill-nëntor, ndërkohë që deri në fund të vitit parashikohet që këto shpenzime të arrijnë në 13.5 mld lekë.
Në këtë vlerë përfshihen 2 paketat financiare për mbështetjen sociale për qytetarët dhe bizneset, të vëna në dispozicion përmes Akteve Normative dhe Vendimeve të Këshillit të Ministrave. Më konkretisht, paketa e parë përfshin mbështetje për Biznesin e Vogël dhe Qytetarët dhe parashikon ndihmë financiare për të punësuarit në subjektet e biznesit me të ardhura vjetore deri 14 mln lekë, për periudhën pas ndërprerjes së aktivitetit ekonomik për shkak të gjendjes së pandemisë së shkaktuar nga COVID19, për të vetëpunësuarit; punonjësit e papaguar të familjes si dhe të punësuarit në këto subjekte.
Gjithashtu, në këtë paketë përfshihet dhe dyfishimi i pagesës së ndihmës ekonomike dhe pagesës së papunësisë, përgjatë kohëzgjatjes së periudhës së fatkeqësisë natyrore. Ndërkaq, paketa e dytë e ndihmës parashikon mbështetjen për Sipërmarrjen dhe Punëmarrësit. Ajo përfshin 6 masa e më konkretisht subvencionim për punonjësit e larguar për bizneset e mbyllur me xhiro deri në 14 mln lekë, mbështetje për të larguarit nga puna në periudhën 1 Mars – 17 Maj, si dhe subvencionim për të gjithë punonjësit e bizneseve me të ardhura nën 14 milionë lekë (përjashtuar 8,000 persona në profesionet e lira, tregtia, farmacitë, përfituesit e pagës së luftës së Paketës 1, etj.).
Gjithashtu, në këtë paketë përfshihet dhe subvencionimi i pagës së luftës për punonjësit e strukturave akomoduese në sektorin e turizmit, mbështetje për punonjësit e Rafinerisë së Ballshit si dhe ndihmë financiare për aplikuesit e ndihmës ekonomike, të cilët nuk janë përzgjedhur nga sistemi i pikëzimit të ndihmës ekonomike.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.