Shpenzimet për shërbimet celulare – Arritën në 7 mijë lekë për çdo përdorues vitin e kaluar
Vitin e kaluar, çdo përdorues shpenzoi mesatarisht rreth 7 mijë lekë për shërbimet e telefonisë celulare. Të dhënat nga Autoriteti i Komunikimeve Elektronike dhe Postare (AKEP) tregojnë se shpenzimi i shqiptarëve për komunikimin me celular u rrit për të tretin vit radhazi. Treguesi i të ardhurës mesatare për përdorues u rrit sipër nivelit të 7 mijë lekëve për herë të parë që prej vitit 2012.
Ky tregues përllogaritet si raport mes të ardhurave të operatorëve celularë nga shërbimet me pakicë me numrin e përdoruesve aktivë të shërbimeve. Sipas AKEP, faktori kryesor ka qenë rritja e të ardhurave me pakicë të operatorëve celularë, si edhe pjesërisht ulja e numrit të përdoruesve active, matur si numër i kartave SIM aktive. Pas masave rregullatore që ndalonin aplikimin e tarifave diskriminuese për thirrjet jashtë rrjetit, numri i kartave SIM aktive ka ardhur në rënie të vazhdueshme, sepse përdoruesit nuk kanë më nevojë të mbajnë disa numra për të kryer thirrje brenda rrjeteve respektive.
Përtej ndikimit marxhinal të këtij faktori, shifrat tregojnë se të ardhurat e operatorëve celularë nga shërbimet retail janë në rritje për të tretin vit radhazi, çka nënkupton se shqiptarët po shpenzojnë më shumë për komunikimin.
Kjo mund të jetë pasojë e rritjes së përqendrimit dhe zgjerimit të pjesës së tregut të operatorit me fuqi dominuese në tregun me pakicë. Konkurrenca, zhvillimi i shpejtë i teknologjisë, me kalimin e afërt në gjeneratën e radhës, 5G, bën që kjo nevoja për investime të jetë e lartë. Në tërësi, dekadën e fundit konkurrenca e ka ulur ndjeshëm përfitueshmërinë e operatorëve, duke reduktuar resurset për investime të reja.
Kjo tendencë po reflektohet në përpjekje për të rritur çmimet e shërbimeve me pakicë, siç dëshmoi shtrenjtimi i paketave mujore të komunikimit që u aplikua në fillim të këtij viti dhe u pezullua më pas, me urdhër të Autoritetit të Konkurrencës.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.