Shpenzimet për trajnim – Zënë vetëm 0.4% të kostos së punës
Trajnimi zë një peshë të papërfillshme kundrejt kostos totale të punës që paguajnë bizneset shqiptare. Sipas të dhënave nga Instituti i Statistikave, vetëm 0.4% e shpenzimeve të biznesit shqiptar për punën shkojnë për trajnimin e punonjësve.
Po të kemi parasysh se kosto mesatare punës për një punonjës llogaritet rreth 741 mijë lekë në vit, atëherë shpenzimi mesatar për trajnim rezulton më pak se 3 mijë në vit për çdo të punësuar. Të vetmit sektorë ku trajnimi zë më shumë se 1% të kostove të punës janë tregu financiar dhe telekomunikacionet.
Përveçse me një nivel më të mirë organizimi dhe menaxhimi, kjo lidhet me natyrën e aktivitetit të këtyre ndërmarrjeve, që është më shumë e mbështetur tek njohuritë e specializuara dhe te inovacioni.
Ndërmarrjet e sektorit financiar dhe kryesisht bankat shpenzojnë 1.45% të kostos totale të punës për trajnim, ndërsa në telekomunikacione ky shpenzim shkon në 1.4% të kostos së punës. Në vlerë monetare, një institucion financiar shpenzon mesatarisht 22 mijë lekë në vit për trajnimin e një punonjësi, ndërsa një ndërmarrje e sektorit të telekomunikacionit shpenzon rreth 15 mijë lekë në vit.
Në shumicën e sektorëve të tjerë, shpenzimet e trajnimit janë të papërfillshme. Në sektorë si energjia dhe furnizimi me ujë, shpenzimet e trajnimit janë sa 0.01% e kostos së punës. E përkthyer në vlerë, janë rreth 1 mijë lekë në vit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.