Shpërdorim detyre, krime mjedisore dhe vjedhje banesash – Policia shton kontrollet gjatë fundjavës. Ndalon 6 shtetas për vepra të ndryshme penale
Policia e Shtetit njofton se Specialistët për Hetimin e Krimit në Komisariatin e Policisë Dibër, në vijim të punës për parandalimin, evidentimin dhe zbardhjen e vjedhjeve të pronës të ndodhura më parë, si dhe kapjen e vënien para përgjegjësisë ligjore të autorëve, kanë organizuar punën dhe si rezultat u bë e mundur zbardhja dhe dokumentimi i vjedhjes së një banese dhe ndalimi i shtetasve: D. B., 22 vjeç, S. B., 26 vjeç banues në Peshkopi.
Sipas njoftimit nga veprimet hetimore ka rezultuar se shtetasit e lartpërmendur në bashkëpunim me një tjetrin, në fshatin Laçes, kanë vjedhur banesën e një 55- vjeçari.
Gjithashtu sipas informacionit të publikuar në zbatim të planit të masave për parandalimin dhe goditjen e krimeve mjedisore dhe si rezultat i kontrollit të pandërprerë të territorit, shërbimet e Komisariatit të Policisë Dibër, kanë proceduar penalisht shtetasin A. K., 47 vjeç, pasi është konstatuar duke transportuar me një automjet fugon lëndë drusore pa dokumentacion përkatës.
Sipas Policisë në vijim të veprimeve në lidhje me këtë rast, janë proceduar penalisht nga Policia shtetasit A. K., 51 vjeç, L. D., 60 vjeç, (me detyrë Inspektor Pyjesh), si të dyshuar se kanë konsumuar elementët e veprës penale “Shpërdorim i detyrës”.
Në njoftim theksohet se nga shërbimet e Komisariatit të Policisë Bulqizë, është proceduar penalisht shtetasi R. D., 44 vjeç, pasi është konstatuar duke transportuar me një automjet ‘Ifa’, lëndë drusore pa dokumentacion përkatës dhe si rrjedhojë janë sekuestruar në cilësinë e provës materiale lënda drusore dhe automjetet që i transportonin ndërsa materialet procedurale i kaluan Prokurorisë për veprime të mëtejshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.