Shpërndahen 22 milion USD si bonus lindjeje – Ezaurohet fondi, nevojiten para’ shtesë deri në mbyllje të vitit

Ndërsa kanë mbetur edhe 4 muaj për të mbyllur vitin 2021, fond i parashikuar të shpërndahet si bonus për lindjet e reja në të gjithë vendin është ezauruar.

Sipas të dhënave të Ministrisë së Financave, deri në fund të Gushtit, kanë shkuar për nënat që kanë sjellë në jetë një fëmijë, 2.2 miliardë lekë në total apo 22 milionë dollarë, aq sa është edhe fond i parashikuar për të gjithë vitin, gjë që do ta detyrojë Ministrinë të bëjë rishikim të buxhetit dhe të akordojë më shumë financa në këtë drejtim për të mbuluar lindjet deri në Dhjetor.

Krahasuar me të njëjtën periudhë të një vitit më parë gjatë Janar-Gusht 2021 janë shpërndarë 430 milionë lekë më shumë, ndërkohë që buxheti total për këtë zë ka pësuar rritje. Por ky tregues jo gjithnjë ecën në sinkron me numrin e lindjeve, pasi sipas treguesve të INSTAT, të paktën për gjysmën e parë të këtij viti lindshmëria është në rënie,  ku regjistrohen afro 2700 lindje më pak. Ndërkohë që sipas formulës së bonusit për bebet, qeveria ofron 40 mijë lekë për beben e parë, 80 mijë lekë për beben e dytë dhe 120 mijë lekë për beben e tretë.  Në gjysmën e parë të vitit regjistrohen  afro 12 mijë lindje.

Bonusi i lindjeve

8-mujori 2020     1.8 mld lekë

8 mujori 2021      2.2 miliardë lekë

Numri i lindjeve

6 mujori 2020                14713  lindje

6 mujori 2021                11.999 lindje

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.