Shpërndarja e avashtë në Europë – Sa njerëz e kanë bërë vaksinën?

Shtetet anëtare vendosin individualisht se kush vaksinohet, kur dhe ku, por Bashkimi Europian po koordinon strategjinë dhe po blen vaksina me shumicë. Të premten, komisioni i BE ra dakord të blinte 300 milionë doza shtesë të vaksinës Pfizer – BioNTech, që do t’i jepte BE- së gati gjysmën e prodhimit global të firmës për vitin 2021.

Gjermani

Fakti që ishin shkencëtarët gjermanë ata që krijuan vaksinën e parë efektive Covid ka qenë burim i një krenarie të madhe kombëtare. Në përgjithësi, gjermanët duket se janë komod me idenë e imunizimit.

Një studim i fundit zbuloi se 65% ishin të përgatitur për të bërë vaksinën. Studime të tjera tregojnë se më pak se një e katërta e të anketuarve nuk do ta bënin këtë. Por politikisht, duke qenë se ky është një vit zgjedhjesh, programi i vaksinimit të Gjermanisë është bërë një fushë beteje.

Vaksinimet filluan afro dy javë më parë dhe u japin përparësi atyre që janë mbi 80 vjeç dhe punëtorëve të shtëpive të kujdesit. Deri të enjten në mbrëmje, ishin administruar më shumë se 477.000 doza të para.

Por disa nga qindra qendra të vaksinimit të përgatitura posaçërisht, nuk janë ende në përdorim. Angela Merkel dhe Ministri i saj i Shëndetësisë, Jens Spahn, janë akuzuar për dështimin për të siguruar doza të mjaftueshme.

Pjesa më e madhe e kritikave ka ardhur nga partnerët e koalicionit të vetë zonjës Merkel, por disa brenda komunitetit shkencor i kanë bërë jehonë shqetësimeve të tyre, duke thënë se Gjermania i vendos interesat europiane mbi të vetat, duke këmbëngulur në një proces të përbashkët të prokurimit të BE-së. Shkencëtarët që zhvilluan vaksinën kanë thënë publikisht se Bashkimi Europian fillimisht refuzoi një ofertë për një porosi të mëtejshme.

Pjesa e Gjermanisë në rendin e BE-së arrin në 56 milionë doza. Deri më tani, 1.3 milionë doza janë dorëzuar dhe mendohet se deri në fund të muajit do të jenë edhe 2.68 milionë.

Gjermania tani ka porositur një shtesë prej 30 milionë dozash dhe. Pas miratimit të fundit europian të vaksinës Moderna, pritet që procesi të fillojë që javën tjetër. Qeveria po qëndron në zotimin e saj se programi i vaksinimit do të përfundojë deri në fund të verës.

Francë

Pas javës së parë, kur Gjermania kishte inokuluar rreth 250.000 njerëz, Franca ishte në vetëm 530. Deri të Premten, shifra ishte rritur në 45.500, ende aq e vogël sa të ishte statistikisht e pakuptimtë.

Atëherë, pse i është dashur kaq kohë që Franca të vënë në veprim planin? Nuk është se autoritetet nuk kishin kohë për t’u përgatitur. Dhe sigurisht që nuk bëhet fjalë për mungesë vaksine. Në fakt, më shumë se një milionë doza Pfizer janë tashmë në depo të ftohtë, në pritje të përdorimit.

Arsyeja kryesore e vonesës duket të jetë natyra e rëndë, tepër e centralizuar e burokracisë shëndetësore të Francës. Një dosje me 45 faqe udhëzimesh e lëshuar nga ministria në Paris duhej të lexohej dhe kuptohej nga stafi në shtëpitë e të moshuarve.

Secili marrës atëherë duhej të jepte pëlqimin e informuar në një konsultë me një mjek, të mbajtur jo më pak se pesë ditë para injeksionit. Procedura e gjatë është në teori për të shpëtuar jetë – ato të pacientëve që mund të kenë një reagim negativ. Por siç kanë argumentuar kritikët, vonesa në inokulimin e popullsisë po kushton gjithashtu jetë njerëzish.

Një problem tjetër në Francë është niveli i lartë i skepticizmit ndaj vaksinimit, produkt i një dyshimi më të përgjithshëm ndaj qeverisë. Sondazhet sugjerojnë që deri në 58% e publikut nuk duan të marrin dozën. Efekti – thonë kritikët – ka qenë për ta bërë qeverinë tepër të kujdesshme.

Pasi Presidenti Emmanuel Macron komunikoi zemërimin e tij për vonesat në fundjavë, ritmi po rritet. Procedura për miratim është duke u thjeshtuar. Deri në fund të janarit, plani është që të ketë 500 – 600 qendra vaksinimi të hapura në të gjithë vendin, ose në spitale ose ndërtesa të tjera të mëdha publike.

Suedi

Pothuajse dy javë që kur banori 91-vjeçar i shtëpisë së të moshuarve Gun-Britt Johnsson u bë suedezi i parë që mori dozën fillestare të një vaksine Pfizer, ende nuk ka ndonjë numër zyrtar se sa të tjerë kanë bërë vaksinimin.

Agjencia e Shëndetit Publik të Suedisë thotë se është në procesin e përpilimit të të dhënave nga 21 autoritetet shëndetësore rajonale të vendit, të ngarkuara me vaksinimin e të gjithë popullsisë së rritur – rreth tetë milion njerëz – deri më 26 qershor.

Data nuk është arbitrare; është fundjava më e madhe e festave publike të vitit, kur suedezët tradicionalisht mbajnë “festimet e Mesit”. Karin Tegmark, një menaxhere e lartë në agjenci, thotë se data mbetet “e realizueshme”, por ajo shprehet se varet gjithashtu nga shpërndarja e vaksinave në vend.

Së bashku me 4.5 milionë doza të vaksinës Pfizer-BioNTech, Suedia ka porositur 3.6 milionë vaksina nga Moderna, e para prej të cilave pritet të mbërrijë javën e ardhshme. Vendi gjithashtu planifikon të hedhë vaksinën Oxford-AstraZeneca sa më shpejt të jetë e mundur, pasi të miratohet nga BE – idealisht deri në Shkurt.

Suedezët fillimisht u dukën të vakët ndaj idesë për të marrë një vaksinë të koronavirusit të zhvilluar shpejt, edhe pse një sondazh në fund të dhjetorit zbuloi se 71% do të merrnin një të tillë. Një indikator kryesor i skepticizmit fillestar mendohet të jetë dështimi i një programi vaksinimi masiv vullnetar për gripin e derrit në 2009. Qindra fëmijë suedezë dhe të rinj nën 30 vjeç patën narkolepsinë e çrregullimit të gjumit, e cila u zbulua të ishte një efekt anësor i Vaksina Pandemrix.

Belgjikë

Dukej e arsyeshme që personi i parë në Belgjikë që mori një vaksinë për Covid, të ishte në vendin ku po prodhohej vaksina e parë e aprovuar në botë Covid. Jos Hermans, një 96-vjeçar nga komuna e Puurs, mori injeksionin më 28 dhjetor, në shtëpinë e tij të kujdesit. 700 banorëve të tjerë të moshuar iu administrua gjithashtu një doze, në atë që ishte një provë e vogël, fillestare.

Programi i vaksinimit masiv në Belgjikë filloi në 5 janar, por është kritikuar për zhvillimin e ngadalshëm. Ministri Federal i Shëndetësisë, Frank Vandenbroucke, kishte premtuar në nëntor se përhapja do të ishte “e përsosur dhe e shpejtë”, duke postuar në Twitter: “Nëse kjo nuk funksionon, më gjuani.”

Faza e parë kërkon të vaksinohen deri në 200.000 banorë të shtëpive të pleqve deri në fund të këtij muaji, ose në fillim të shkurtit. Profesionistët e shëndetësisë do të jenë në radhë të dytët dhe qëllimi ka qenë që e gjithë popullsia të inokulohej deri në fund të Shtatorit.

Ju mund të mendoni se vendi do të ishte në një avantazh duke qenë epiqendra e prodhimit Pfizer-BioNTech. Ndërsa kjo ndihmon qartë në shpërndarjen, Belgjika nuk mund të marrë më shumë doza, në krahasim me popullsinë e saj, sesa vendet e tjera të BE-së sipas rregullave të rrepta të Komisionit.

Pasi morën një garanci nga Pfizer mbi furnizimin e vakisnës, autoritetet federale belge kanë përshtatur strategjinë e tyre: ata tani propozojnë dhënien e sa më shumë dozave të disponueshme për sa më shumë njerëz që të munden  dhe mos – rezervimin për dozën e dytë të pacientëve, që jepet tre javë pas të parës.

Spanjë

Spanja filloi administrimin e vaksinës në 27 Dhjetor. Deri më tani, 743.925 doza janë shpërndarë në administratat rajonale, me 277.976 njerëz të vaksinuar, sipas Ministrisë së Shëndetësisë. Objektivi i qeverisë së koalicionit është të imunizojë 2.3 milionë njerëz brenda 12 javësh. Përparësi u jepet banorëve të moshuar të shtëpive të kujdesit, atyre që kujdesen për ta dhe personelit të kujdesit shëndetësor.

Secili nga 17 rajonet e vendit ka një shkallë të lartë të kontrollit mbi kujdesin shëndetësor dhe duhet të marrë numrin e dozave që korrespondojnë me popullsinë përkatëse. Megjithatë, tashmë ka pasur një pabarazi të konsiderueshme gjeografike.

Të dhënat e qeverisë treguan, për shembull, se ndërsa rajoni verior i Asturias kishte përdorur 55% të dozave që kishte marrë deri më 3 janar, rajoni i Madridit kishte administruar vetëm 5% në të njëjtën datë. Disa rajone po mbajnë dozat për të administruar një goditje të dytë pasuese tek i njëjti person brenda disa javësh dhe disa kanë vaksinuar në festat kombëtare ndërsa të tjerët jo.

Megjithëse vaksinimi është vullnetar, qeveria ka thënë se po bën një regjistër të atyre që nuk dëshirojnë të inokulohen. Kjo iniciativë ka gjeneruar polemikë, megjithëse qeveria ka këmbëngulur që regjistri thjesht do të kërkojë të sqarojë pse njerëzit e refuzojnë vaksinimin.

Burimi origjinal: BBC

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.