Shpërndarja e lëndëve narkotike – Policia arreston shtetasin, sekuestron 35 mijë lekë

Policia e Shtetit ka finalizuar operacionin e koduar “SHTRAUS”, për goditjen e shpërndarjes së drogave të forta në doza të vogla.

Sipas njoftimit janë sekuestruar 20 doza Heroinë, si dhe një sasi lekësh të përfituara nga shitja e saj.

Policia ka arrestuar poseduesin, njëherazi dhe shpërndarësi i lëndës narkotike. Sipas njoftimit, seksioni për Hetimin e Narkotikëve në Drejtorinë Vendore të Policisë Tiranë, në bazë të informacioneve të siguruara në rrugë operative nga burime të ndryshme, finalizoi me sukses operacionin e koduar “SHTRAUS”, ku u bë i mundur arrestimi në flagrancë i shtetasit L. F., 27 vjeç, lindur në Bukuresht dhe banues në Tiranë, i dënuar më pare për vjedhje.

Policia tha se për shtetasin në fjalë Specialistët e Seksionit për Hetimin e Narkotikëve të Drejtorisë Vendore të Policisë Tiranë dispononin informacion se u shiste lëndë narkotike Heroinë në qytetin e Tiranës, kryesisht në sheshin “Shtraus”, personave të ndryshëm, përdorues të lëndëve narkotike. 27-vjeçari u kap në flagrancë me doza lënde narkotike Heroinë, të gatshme për t’u hedhur në treg në zonën pranë sheshit “Shtraus”, ku gjatë kontrollit fizik dhe në banesë iu gjetën dhe sekuestruan në cilësinë e provës materiale 20 doza me lëndë të dyshuar Heroinë, një peshore elektronike, për peshimin dhe ndarjen e lëndës narkotike në sasira të vogla si edhe 35.000 lekë të grumbulluara nga shitja e lëndës narkotike Heroinë dhe një celular.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.