Shpërthime tronditin Kievin pas takimit të shefit të OKB-së, Guterres raportohet i sigurt – Çfarë dimë deri tani?!
Sekretari i Përgjithshëm i OKB-së ka vizituar vendet e mizorive pranë Kievit të enjten, përpara se të nisej për në kryeqytet për bisedime me Volodymyr Zelenskyy pasdite, ndërsa ekipet humanitare të OKB-së planifikojnë një evakuim të civilëve nga Mariupol në koordinim me Kryqin e Kuq. Ndërkohë, Vladimir Putin paralajmëroi të mërkurën se çdo ndërhyrje e jashtme në konfliktin në Ukrainë do të përballej me një “përgjigje të shpejtë dhe shkatërruese” edhe pse sekretari i jashtëm i Mbretërisë së Bashkuar u kërkoi aleatëve perëndimorë që të dërgojnë më shumë armë të rënda në Ukrainë, duke përfshirë avionë.
Pikat kryesore të së enjtes:
- Sekretari i Përgjithshëm i Kombeve të Bashkuara, António Guterres, në Ukrainë për të takuar Presidentin Zelenskyy, i bëri thirrje Moskës të “pajtojë të bashkëpunojë” me hetimet ndërkombëtare të krimeve të luftës.
- Të paktën dy shpërthime goditën Kievin pas takimit, me Guterres që thuhet se ishte “i sigurt”, por “i tronditur”.
- Më herët të enjten, ndërsa vizitonte qytetet pranë Kievit, të cilat janë bërë simboli i mizorive ruse, ai e cilësoi luftën si “ferr” dhe “marrëzi në shekullin e 21”.
- Sulme me raketa u raportuan gjithashtu në Odesa, me të paktën dy seri shpërthimesh dhe tre raketa të raportuara të kapura sipas autoriteteve lokale.
- Kremlini ka thënë se siguria europiane është e kërcënuar nga furnizimet me armë perëndimore. Ai erdhi pasi kryediplomati i Mbretërisë së Bashkuar bëri thirrje që të dërgohen më shumë armë të rënda dhe që Rusia të shtyhet nga “e gjithë Ukraina”.
- Sekretari i Përgjithshëm i NATO-s, Jens Stoltenberg tha se Finlanda dhe Suedia do të përqafohen me krahë hapur nëse vendosin t’i bashkohen aleancës ushtarake. Shefat e inteligjencës së vendeve nordike kanë paralajmëruar se ata duhet të përgatiten për rritje të operacioneve të spiunazhit rus, sulmeve kibernetike dhe përpjekjeve për të ndikuar tek politikanët.
- Ligjvënësit gjermanë kanë votuar në favor të dërgimit të armëve të rënda në Ukrainë në një vendim simbolik që pasqyron ndryshimin e kursit të qeverisë.
- Presidenti Zelenskyy thotë se Rusia po përdor gazin si armë kundër Evropës, pasi kompania shtetërore Gazprom ndërpreu furnizimet për Poloninë dhe Bullgarinë.
- Megjithatë, të dy vendet mund të jenë në rregull pa furnizimet me gaz rus për disa muaj — të paktën deri në dimër.
- OKB thotë se zyra e saj humanitare po mobilizon një ekip me përvojë për të koordinuar evakuimin kompleks të civilëve nga Mariupol.
- Vladimir Putin paralajmëroi kundër çdo ndërhyrjeje të jashtme në konfliktin në Ukrainë, duke premtuar se do të pritej me një përgjigje “të shpejtë dhe shkatërruese”.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.