Shpronësime për zonën e re për zhvillim te “5 Maji” në Tiranë! 4.5 miliardë lekë, 222 shpronësime (Emrat)
Ministria e Infrastrukturës dhe Energjisë ka shpallur kërkesën për shpronësim dhe/ose për shkëmbimin e pronës, për interes publik, në zonën e re për zhvillim, në Njësinë Administrative 4 dhe 8, zona “5 Maji”, Bashkia Tiranë.
Njësia zbatuese për këtë projekt është Bashkia Tiranë.
“Me anë të këtij publikimi, kërkojmë të vëmë në dijeni personat e prekur nga ky shpronësim dhe/ose për shkëmbim, për interes publik, për pasuritë e paluajtshme, pronë private, të cilat do të kompensohen sipas vlerësimit paraprak të llogaritur.
Personat që preken nga ky projekt, të cilët kanë emrin në tabelën e publikuar dhe personat të cilët preken, por nuk figurojnë në këto lista, jo më vonë se 15 (pesëmbëdhjetë) ditë nga publikimi në Fletoren Zyrtare dhe në portalin unik qeveritar për rindërtimin, kanë të drejtë të paraqesin pretendimet e tyre, të shoqëruara me dokumentet përkatëse pranë Bashkisë Tiranë, si dhe në Ministrinë e Infrastrukturës dhe Energjisë, duke u shprehur nëse pranojnë kalimin vullnetar të pronësisë me kushtet e ofruara” njofton Ministria.
Kërkesa për shpronësim dhe/ose shkëmbimin e pronës, për interes publik, në funksion të procesit të rindërtimit, është me vlerë totale paraprake të kompensimit nga shpronësimi në shumën prej 4 miliardë e 570 milionë lekë e 539 mijë e 342 lekë.
Në total, për zonën e re për zhvillim preken 222 prona private dhe shtetërore.
Për të lexuar listën emërore të të shpronësuarve: KLIKO KETU
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.