Shqipëri – Itali – Nënshkruhet Memorandumi në fushën e Bashkëpunimit Ekonomik
Shqipëria ka nënshkruar sot një Memorandum në fushën e Bashkëpunimit Ekonomik me Italinë gjatë punimeve të Forumit të Biznesit midis dy vendeve të zhvilluar në Tiranë.
Në forum morën pjesë një Mision ekonomik i kryesuar nga zëvendësministri i Zhvillimit Ekonomik Ivan Scalfarotto dhe mbi 250 sipërmarrje të mëdha si dhe 300 delegatë nga ente e ndërmarrje të ndryshme të cilat së bashku përfaqësojnë një portofol me mbi 17 miliardë euro.
Ata zhvilluan takime me sipërmarrjet shqiptare në kuadër të bashkëpunimit ekonomik të dy vendeve dhe mbi mundësitë e investimit në Shqipëri.
Ministri i Financave dhe Ekonomisë Arben Ahmetaj dhe zv.ministri Italian Scalfaratto zhvilluan edhe një konferencë për shtyp për mediat e vendeve respektive, ku paraqitën edhe konkluzionet e Forumit, duke përsëritur ftesën për më shumë investime italiane në Shqipëri.
Ahmetaj e konsideroi këtë si momentin më të mirë ekonomik për vendin tonë si dhe një vit të rëndësishëm në kuadër të perspektivës së integrimit në BE.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.