Shqipëri-Kosovë thellojnë bashkëpunimin në shëndetësi – Dakordësi për shkëmbimin e ndërsjelltë të mjekëve
Ministrja e Shëndetësisë dhe Mbrojtjes Sociale, znj. Ogerta Manastirliu priti në Tiranë Ministrin e Shëndetësisë së Kosovës, z.Uran Ismaili ku dakordësuan bashkëpunimin dhe shkëmbimet e ndërsjellta sipas përvojave më të mira të secilit shtet, mes të cilave edhe shkëmbimi i ndërsjelltë i mjekëve sipas nevojave
Shkëmbimet e ndërsjellta dhe reformat e ndërmarra në sektorin e shëndetësisë nga Kosova dhe Shqipëria kanë qenë edhe fokusi i takimit të Ministres së Shëndetësisë dhe Mbrojtjes Sociale, Ogerta Manastirliu dhe ministrit të Shëndetësisë së Kosovës, Uran Ismaili gjatë vizitës së këtij të fundit në Tiranë.
Manastirliu e ka cilësuar këtë një mundësi të mirë për të ndarë eksperiencat dhe për të mbështetur njëri tjetrin në reformimin e sistemit shëndetësor në të dy vendet.
Shkëmbimi i ndërsjelltë i mjekëve sipas nevojave të Shqipërisë nga spitalet e Prizrenit dhe Gjakovës për shërbime të caktuara në veri të vendit dhe nga ana tjetër, mjekë të qendrave universitare të Shqipërisë për të dhënë shërbim në qendrat klinike universitare të Kosovës ishte një tjetër çështje që u diskutua në takim. Ndërkohë, kjo është sanksionuar tashmë edhe në marrëveshjen midis dy vendeve.
Delegacioni i Kosovës gjatë vizitës së tij zhvilloi takime në Qendrën Spitalore ‘Nënë Tereza’ dhe Fondin e Sigurimit të Detyrueshëm të Kujdesit Shëndetësor me qëllim shkëmbimin e përvojave profesionale, kryesisht në fushën e sigurimeve shoqërore për ngritjen e Fondit të Sigurimeve Shëndetësore në Kosovë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.