Shqipëria asnjë përparim me paratë e pista – Raporti i DASH: Risku i lartë prej korrupsionit, krimit të organizuar dhe institucioneve të dobëta
Departamenti Amerikan i Shtetit konkludon se Shqipëria nuk ka bërë asnjë përparim të dukshëm në luftën kundër pastrimit të parave. Në raportin e sapopublikuar për vendin tonë, Departamenti Amerikan i Shtetit thotë se Shqipëria mbetet e ndjeshme ndaj pastrimit të parave për shkak të korrupsionit, rrjeteve të krimit të organizuar dhe institucioneve të dobëta ligjore dhe qeveritare. Vendi ka një ekonomi të madhe parash dhe sektor informal, me flukse të konsiderueshme parash nga jashtë në formën e remitancave dhe investimeve të ndryshme. Krimet kryesore të gjenerimit të të ardhurave në Shqipëri përfshijnë trafikimin e drogës, evazionin fiskal dhe kontrabandën. Ndërkaq, Organizatat kriminale shqiptare kanë lidhje me rrjetet që veprojnë në Evropë dhe Amerikën e Jugut.
Raporti analizon efektet e reformës në drejtësi, të cilat kanë përmirësuar prespektivën në luftën kundër pastrimit të parave, përpjekje që gjithësesi do të vihen në sfidë nga korrupsioni.
Reformat e vazhdueshme gjyqësore, theksohen në raportin e Departamentit Amerikan të Shtetit, duke përfshirë vettingun e gjyqtarëve dhe prokurorëve për të çrrënjosur korrupsionin nga sektori i drejtësisë dhe krijimin e njësive të shumta policore të specializuara që synojnë krimet financiare dhe ekonomike, kanë përmirësuar perspektivat e Shqipërisë për adresimin e pastrimit të parave. Sidoqoftë, këto përpjekje vështirësohen nga sfidat e kapacitetit në institucionet e drejtësisë të krijuara së fundmi dhe korrupsioni i përhapur që minon shtetin e ligjit.
Po ashtu, Shqipëria regjistroi disa përparime me përdorimin e ligjit të saj të konfiskimit antimafia, duke përfshirë konfiskimin e 40 përqind të pasurive që i përkisnin mbretit famëkeq të drogës Klement Balili, i quajtur “Escobar i Ballkanit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.