Shqipëria del kundër Kinës! Krah të mëdhenjve, firmëtarja e vetme nga Ballkani e rezolutës së OKB kundër Pekinit
“Ne i bëjmë thirrje qeverisë kineze që të përmbushë ligjet e saj kombëtare por edhe detyrimet ndërkombëtare, si dhe angazhimet për të respektuar të drejtat e njeriut, përfshirë lirinë e besimit dhe të fesë, në Xinjiang dhe në të gjithë Kinën. Qeveria kineze duhet të implementojë në mënyrë urgjente 8 rekomandimet e Komitetit për Eleminimin e Diskriminit Racor, përfshirë arreestimet e ujgurëve si dhe anëtarët e komuniteteve të tjera muslimane”,- kështu citon rezoluta e prezantuar në Kombet e Bashkuara nga ambasadorja britanike në Organizatë e që mban firmën e 23 shteteve.
https://www.gov.uk/government/speeches/joint-statement-on-xinjiang
Një prej këtyre shteteve është pikërisht Shqipëria, i vetmi vend ballkanik firmëtar. Jo vetëm i Ballkanit perëndimor, por i të gjithë rajonit më gjerë. Shqipëria në këtë rezolutë rezulton të jetë firmëtare krah vendeve si Holanda, Franca, Gjermania, Shtetet e Bashkuara të Amerikës, apo Britania e Madhe, Belgjika, Austria, Suedia, Finlanda, etj.
Në listë figurojnë vetëm vende të zhvilluara, kryesisht europiane, me përjashtim të Australisë, Zelandës së Re dhe Shteteve të Bashkuara të Amerikës.
Veç Shqipërisë në listë ndër shtetet e Europës lindore, figurojnë vetëm Letonia, Lituania dhe Estonia. Shqipëria rezulton të jetë gjithashtu i vetmi vend me popullsi muslimane në listë, paçka se rezoluta i referohet kryesisht diskriminimit të ujgurëve dhe popullsive të tjera muslimane në Kinë.
Ky reshtim i politikës së jashtme të Shqipërisë krah të mëdhenjve, dhe duke u veçuar nga vendet e tjera të rajonit, e sidomos ato të Ballkanit Perëndimor vjen në një kohë që fuqitë e mëdha, e sidomos Shtetet e Bashkuara të Amerikës kanë rritur paralajmërimet sa i përket përpjekjeve të Kinës dhe Rusisë për influencë në rajon. Ky rreshtim i Shqipërisë duket të jetë një sinjal i qartë për pozicionimin e politikës sonë të jashtme.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.