Shqipëria do kërkojë 500 mln euro borxh / Pritet emetimi i eurobondit këtë vit, përfshihet në aktin normativ
Akti normativ numër.26, i katërti për të ndryshuar buxhetin e shtetit 2021, përfshin në nenin 10 të tij sjell edhe një risi, atë të emetimit të një eurobondi të ri, me vlerë, 61.89 mld lekë, që përkthehet në rreth 500 milionë euro. Ky do të ishte eurobondi i 5-të i qeverisë shqiptare. Kujtojmë se gjatë vitit të kaluar, qeveria shqiptare bëri një tjetër dalje në tregjet ndërkombëtare, me një Eurobond prej 650 milionë eurosh, me një normë interesi prej 3.5%, i cili në pjesën dërrmuese shkoi për të mbuluar financimin e eurobondit paraardhës. Eurobondi i ri prej 500 milionë eurosh që pritet të emetohet këtë vit, do të shkojë edhe për të mbuluar shpenzimet e rritura në buxhetin e shtetit, të cilat vetëm me aktin e ri normativ, prekin shifrën e thuajse 100 milionë eurove, ndërkohë që të ardhurat nuk parashikohet të ndryshojnë.
Vetëm dy ditë më parë, Ministria e Financave ka nxjerrë një thirrje për propozim për konsulentë sa i përket emetimit të një eurobondi të ri, me interes specifik në tregjet amerikane, pa specifikuar datë. Ministria e Finacave dhe Ekonomisë ka hapur kështu thirrjen për konsulencë ligjore për emetimin e këtij eurobondi, me një kontratë me vlerë maksimale rreth 22 mln lekë.
Kujtojmë se në fund të vitit të kaluar ishte Fondi Monetar Ndërkombëtar që paralajmëronte daljen e Shqipërisë në tregjet ndërkombëtare me një Eurobond prej 500 mln eurosh, por në vitin 2022, nëse nuk do të lindnin nevoja shtesë. Këto nevoja shtesë duket se janë konkretizuar, dhe qeveria shqiptare do të përshpejtojë planet, për të dalë sërish këtë vit në tregje për huamarrje. Sipas FMN një dalje e radhës parashikohet edhe në vitin 2025.
Roel Korkurti – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.