Shqipëria do të ketë për herë të parë ligj për start-upet, ministrja Denaj: “Mbështesim bizneset inovatore”

Shqipëria do të mund të ketë për herë të parë një kuadër të plotë ligjor për funksionimin e start up-ve, si një nevojë dhe kërkesë gjithnjë në rritje që po vjen nga zhvillimi i tregjeve.

Ministrja e Financave dhe Ekonomisë Anila Denaj, së bashku me Ministrin e Shtetit për Mbrojtjen e Sipërmarrjes Eduard Shalsi morën pjesë në takimin virtual për hapjen e konsultimit publik për kuadrin e ri ligjor që po hartohet për ngritjen, zhvillimin dhe krijimin e ekosistemeve të start up-ve në fushën e inovacionit

“Ky projektligj  ka për qëllim krijimin i një kuadri rregullator dhe institucional i cili mbështet dhe favorizon krijimin dhe zhvillimin e bizneseve të reja me potencial të lartë rritjeje, në fushën e teknologjisë dhe inovacionit, të njohura botërisht si Startup-e Inovative, të cilat realizojnë ide, modele, produkte dhe procese të reja biznesi, të cilat sjellin risi dhe përmirësim të ndjeshëm në çdo fushë të ekonomisë. “ – tha ministrja Denaj, duke shtuar më tej se kuadri ligjor vjen edhe si një nevojë e direktivave nga Bashkimi Europian.

Sipas ministres, ky ligj do të jetë për të rinj, me kapacitete në fushën teknologjike, inovacionit, programeve, softëare dhe IT, të cilët kanë ide biznesi dhe do të ndihmohen për t’i shndërruar në ide biznesi ose për t’i çuar ato përpara.

“Kuadri i ri ligjor do të ketë efekte pozitive, direkte dhe të menjëhershme për ato ndërmarrje të vogla e të mesme që do të certifikohen dhe mbështeten si start up-e inovative. Për shmangien e ndikimeve negative mbi konkurrencën dhe deformimit të tregut, mbështetja do të jepet në përputhje me legjislacionin për ndihmën shtetërore dhe vetëm pas miratimit nga strukturat përgjegjëse”, tha Ministrja Denaj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.