Shqipëria do vuajë për shkak të turizmit! Wiiw: Kriza ekonomike e Covid-19, do jetë një prej vendeve më të prekura në Europë
Vetëm pak ditë pasi shkurtoi ndjeshëm projeksionet për rritjen ekonomike të rajonit, Instituti i Vienës për Studime Ekonomike Ndërkombëtare ( Wiiw) ka publikuar një studim të zgjeruar mbi impaktin e Covid-19 në ekonomitë e rajonit, mes të cilave edhe Shqipëria.
Institucioni thotë se, vendet të cilat e kanë ekonominë e tyre të varur nga turizmi, do të vuajnë më shumë, dhe këto vende janë: Shqipëria, Kroacia dhe Mali i Zi. Për këto shtete, situata do të jetë e dëshpëruar paralajmëron Instituti i Vienës.
Ky paralajmërim ogurzi bazohet në shifrën që tregon peshën e sektorit turistik në prodhimin ekonomik të vendit. Sipas asaj që shkruhet në raportin e institucionit, turizmi zë në mënyrë indirekte 26.3% të Prodhimit të Brendshëm Bruto.
Asnjë vend tjetër në rajonin e gjerë të Europës qendrore dhe lindore nuk ka një normë kaq të lartë, as Kroacia, as Mali i Zi, apo as Turqia. Edhe financat publike pritet të dëmtohen ndjeshëm nga kjo situatë, e cila pritet të zgjasë.
Shqipëria vlerësohet si një prej katër vendeve me borxhin më të lartë ndaj PBB-së, bashkë me Kroacinë, Hungarinë, Malin e Zi dhe Slloveninë. Raporti evidenton se Kroacia, Shqipëria dhe Mali i Zi do të vuajnë më shumë krizën, në financat publike, pikërisht si pasojë e turizmit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.