“Shqipëria e 2030, zgjedhja e çdo shqiptari”, Rama flet pas dorëzimit të listave: Skuadra e PS shkon përtej partisë

“Shqipëria e 2030” dhe jo emigracioni, sipas kryeministrit Edi Rama do të jetë zgjedhja e parë e çdo shqiptari. Gjatë një konferencë për media për dorëzimin e listave të kandidatëve për deputetë, kryeministri foli për mundësitë dhe kapacitetet për ta bërë Shqipërinë një vend të denjë për të jetuar dhe investuar.

“Shqipëria e 2030-ës duhet të jetë zgjedhja e parë e çdo shqiptari dhe jo emigracioni të jetë zgjedhja e shumëkujt që për 1001 arsye legjitime preferon emigracionin dhe jo Shqipërinë. Natyrisht është e bukur dhe e lehtë ta thuash dhe shumë më e vështirë ta bësh, por besoj se I kemi të gjitha mundësitë, eksperiencën dhe kapacitet njerëzor që ta realizojmë këtë ambicie.”

Rama foli për emrat, më të cilët Partia Socialiste do të garojë në 25 prill, duke e cilësuar një skuadër që shkon përtej partisw dhe që reflekton fuqinë e ndryshimit.

“Partia Socialiste e mishëron me formacionin e saj më shumë se asnjëherë më parë karakterin e vetë shoqërisë. Ne kemi një skuadër që shkon përtej Partisë Socialiste dhe që reflekton fuqinë tonë të vetëndryshimit, e cila është pika e parë e manualit të drejtimit të Partisë Socialiste që lindi nga një fuqi vetëndryshimi në kushte historike dramatike dhe që në drejtimin e Fatos Nanos e pati pikë referimi vetëndryshimin. ”

Që në nisje të fjalës, kryeministri foli për një “skuadër që shkon përtej partisë së tij duke zbuluar edhe sloganin  me të cilin kjo parti do garojë; “Shqipëria, e ardhmja jonë”.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.