“Shqipëria, e paarsimuar” – Raporti i BB: Shqiptarëve i mungojnë 4 vite arsimim. Ata që i kanë, janë larguar
Raporti më i fundit i Bankës Botërore për migrimin dhe largimin e trurit nxjerr në pah disa të dhëna që duhet të shërbejnë si këmbanë alarmi. Shqipëria është një prej vendeve me hendekun arsimor më të lartë në rajonin e Europës lindore dhe Azisë Qëndrore.
Sipas Bankës Botërore, shqiptarëve i`u mungojnë rreth 4 vite arsimim, pra janë në deficit të ndjeshëm arsimor. Vetëm Kosova dhe Maqedonia e Veriut janë më keq se ne në këtë drejtim, ndër vendet e Ballkanit Perëndimor.
Mesatarja e rajonit të gjerë është diçka më pak se 3%. Sipas Bankës Botërore, në shumë vende kjo mund të lidhet ngushtë me shtrirjen gjeografike të një shteti, pra me largësinë nga deti. Por, ky nuk është aspak rasti i Shqipërisë, pasi vendi ynë është i pari ndër të gjitha këto vende në këtë drejtim, me thuajse 100% të popullsisë së saj që jeton brenda 100 kilometrave nga bregu.
Por, nuk mbaron me kaq. Jo vetëm që shqiptarëve i`u mungojnë 4 vite arsimim, por edhe ata që janë mjaftueshëm të arsimuar, largohen. Sipas të njëjtit raport, në Shqipëri norma e të larguarve me arsim të lartë fiksohet në rreth 40%, ndër më të lartat, por jo më e larta në rajon.
Veç të tjerash, 1/3 e atyre që kanë kryer arsimin e lartë në vendin tonë, janë larguar në emigracion. Pra, jo vetëm që në Shqipëri ka një defiçit të theksuar njerëzish të arsimuar, por edhe ata pak njerëz që janë të arsimuar sa duhet, janë larguar, apo vazhdojnë të largohen.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.