Shqipëria eksporton edhe nga ajri – 80 milionë lekë mallra të transportuar me postë ajrore në Shtator
Në Shtator, volumi i mallrave të transportuar me rrugë ajrore ishte 184 ton, në rritje me 7.6% nga një vit më parë. Megjithatë, kjo përbën vetëm 0,05% të transportit total të mallrave, ndërsa në strukturën e eksporteve zë 0,2%.
Por cilat janë eksportet shqiptare me avion?
Sipas të dhënave të Institutit të Statistikave, me ajër janë transportuar 1.8% e mallrave nga grupi “Makineri dhe pajisje, Pajisje zyre dhe kompjuter, etj.”; 0.3% e mallrave nga grupi “Tekstile dhe produkte tekstili, lëkurë dhe produkte lëkure”; si edhe 0.3% e mallrave nga grupi “Produkte ushqimore, pijeve dhe duhanit”.
Në bazë të këtyre të dhënave, SCAN ka llogaritur vlerat e mallrave për secilin grup dhe rezulton se eksporti ajror kap vlerën e 80,4 milionë lekëve dhe ndahet si më poshtë:
41 milionë lekë në makineri, pajisje, kompjuter, etj.
32,7 milionë lekë në tekstile dhe lëkurë
6,5 milionë lekë në ushqime, pije dhe duhan
Por Shqipëria edhe importon nga ajri, i cili zë 2,8% të strukturës së importeve sipas mënyrës së transportit.
Pjesa më e madhe e postës ajrore në hyrje i takon po ashtu grupit të makinerive e pajisjeve, brenda së cilit zë 8.5% së importeve. Kjo llogaritet në një vlerë rreth 194 milionë lekë.
Në produktet kimike, produktet e gomës dhe plastikës, transporti ajror zë 2,9% të importeve. Sipas një llogaritjeje, kjo përkon me vlerën 12.7 milionë lekëve.
Përmes ajrit importohet edhe një pjesë e vogël e mallrave si “metale, produkte metalike” (0.3%); “tekstile dhe lëkurë” (0.6%); si edhe “produkte ushqimore, pije, duhan” (0.1%). Të llogaritura në vlerë ato janë përkatësisht: 11 milionë lekë, 65.5 milionë lekë dhe 2.1 milionë lekë.
Kështu, në total, importet nga ajri kapin një vlerë rreth 285.3 milionë lekëve, gati 200 milionë lekë më shumë se eksportet, për një “deficit ajror” prej 71%.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.