Shqipëria fiton më shumë – Projektet në infrastrukturë, do të rritet PBB për frymë dhe mirëqenia
Banka Europiane për Rindërtim dhe Zhvillim vlerëson se, Shqipëria do të jetë vendi i dytë në rajon, pas Serbisë sa i përket përfitimeve që do të ketë në 2 dekadat e ardhshme si pasojë e investimeve në infrastrukturën e transportit. Këto të dhëna dalin në pah nga raporti më i fundit i tranzicionit. Këto investime përkthehen në rreth 2.3% të Prodhimit të Brendshëm Bruto për frymë. Siç duket qartë edhe nga grafiku, vetëm Serbia pritet të korrë më shumë përfitime, në rreth 2.5% të Prodhimit të Brendshëm Bruto.
Nga ana tjetër, BERZH thotë gjithashtu se, këto investime në infrastrukturë do të përkthehen edhe në një rritje të mirëqenies, me rreth 1.5%. Edhe në këtë drejtim, Shqipëria vlerësohet të jetë e dyta në rajon, pas Serbisë, ndërkohë që vendet e tjera të rajonit ndjekin të gjitha me norma bindshëm më të ulta, në të dy indikatorët. Bëhet fjalë për projektet e financuara nga Banka Europiane për Rindërtim dhe Zhvillim në rajon, dhe rezulton se Serbia dhe Shqipëria janë dy vendet që do të përfitojnë më shumë.
Por jo e njëjta gjë mund të thuhet për iniciativën “një rrip një rrugë”. Këtu, rezulton se, Shqipëria do të jetë vendi me më pak përfitime ndër fqinjët, me vetëm 0.1% të PBB përfitimin deri në 2040 dhe rreth 0.5% në indikatorin e mirëqenies, thotë BERZH.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.