Shqipëria forcon kontrollet kufitare! Ngrihet Njësia e Informacionit të Pasagjerëve, kompanitë të detyruara të raportojnë emrat
Në Policinë e Shtetit do të ngrihet një strukturë e re e emërtuar Njësia e Informacionit të Pasagjerëve. Kjo njësi do të ketë në përbërje përafërsisht 17 punonjës policie. Kjo parashikohet në amendamentet që po i bëhen ligjit “Për kontrollin kufitar”.
Referuar relacionit, projektligji është hartuar si një domosdoshmëri për plotësimin e paketës së akteve ligjore që synojnë përafrimin e legjislacionit të Bashkimit Evropian në fushën e kontrollit kufitar dhe të luftës kundër terrorizmit e krimeve të rënda.
“Në vitin 2004 Këshilli i Bashkimit Evropian miratoi direktivën 2004/82, datë 29 prill 2004, e cila parashikon detyrimin e transportuesve ajrorë që të transmetojnë të dhënat apo informacionet paraprake të pasagjerit (Direktiva API), me qëllim përmirësimin e kontrollit kufitar dhe parandalimin e migracionit të paligjshmëm.
Të dhënat që, sipas kësaj direktive duhet të dërgohen paraprakisht pranë autoritetit kompetent kombëtar, kanë të bëjnë me llojin, numrin, vendin e lëshimit dhe datën e skadimit të çdo dokumenti udhëtimi, shtetësinë, mbiemrin, emrim/emrat e tjerë, gjininë, datën e lindjes, linjën ajrore, numrin e fluturimit, datën e nisjes, datën e mbërritjes, aeroportin e nisjes, aeroportin e mbërritjes, kohën e nisjes dhe kohën e mbërritjes, si dhe numrin në total të pasagjerëve që transportohen.
Në vitin 2016 u miratua direktiva (BE) 2016/681 e Parlamentit dhe Këshillit Evropian, e datës 27 prill 2016, mbi përdorimin e të dhënave të regjistrit të emrit të pasagjereve për parandalim, zbulim, hetim dhe ndjekjen e veprave penale me qëllime terroriste dhe krime të rënda (Direktiva PNR). Ky akt rregullon transmetimin e të dhënave të pasagjerëve të udhëtimeve ndërkombëtare nga transportuesit ajrorë pranë autoriteteve kompetente kombëtare, si dhe përpunimin e këtyre të dhënave.
Të dhënat regjistrohen nga agjencitë e udhëtimit dhe/ose nga transportuesit ajrorë apo operatorë turistikë dhe përmbajnë informacione për pasagjerët përfshirë, por pa u kufizuar, numrin e pasaportës, adresën IP që është përdorur për prenotimin, itinerarin e udhëtimit, ndryshime të mundshme të prenotimit, numrin e telefonit, të dhëna mbi mënyrën e pagesës dhe adresën e faturimit etj.
Të dyja direktivat shërbejnë si instrumente për përforcimin e kontrollit kufitar, parandalimin e migracionit të paligjshëm, si dhe luftën kundër terrorizmit apo krimeve të tjera të rënda. Nëpërmjet grumbullimit dhe shpërndarjes të të dhënave të pasagjerëve, por edhe të rezultateve të përpunimit të tyre, agjencitë ligjzbatuese kanë mundësinë e parandalimit dhe hetimit të veprave penale, por jo vetëm.
Përpunimi i informacioneve, në veçanti krahasimi, analizimi dhe krijimi i profileve të riskut, mundëson, gjithashtu, identifikimin e modeleve të sjelljeve të dyshimta dhe që diktojnë nevojën për kryerjen verifikimeve nga ana e autoriteteve kompetente” shkruhet në relacionin e projektligjit.
Direktivat e sipërpërmendura kanë parashikuar detyrimet për transportuesit ajrorë dhe shtetet anëtare, por është lënë në diskrecion të këtyre të fundit mënyra e implementimit të këtyre detyrimeve.
Sa i përket Shqipërisë, parashikohet që efekti financiar për implementimin e sistemit që do të mundësojë transmetimin e të dhënave të pasagjerit, vlerësuar në lekë, arrin në rreth 227 milionë lekë.
Kostoja për sigurimin e këtij sistemi do të mbulohet nga mbështetja e partnerëve ndërkombëtarë, nëpërmjet marrëveshjes së bashkëpunimit. Konkretisht, Ministria e Brendshme ka negociuar dhe është duke finalizuar marrëveshjen përkatëse me palën amerikane.
Kostoja si më sipërcituar do të vlerësohet, si më poshtë vijon:
- Kostoja e programit do të jetë 0;
- Kostoja e instalimit do të jetë 0;
- Kostoja e mirëmbajtjes do të jetë 0 për 3 ose 5 vitet e para të implementimit të projektligjit, kjo në varësi të përcaktimit në marrëveshje. Në vijim, nëse nuk do të garantohen nga partnered ndërkombëtarë do të planifikohet për vitet përkatëse;
- Kostoja e shkëmbimit të të dhënave do të jetë rreth 246 mijë e 580 lekë në muaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.