Shqipëria hap dyert për refugjatët? – Ministria e Brendshme: Kemi një plan strehimi

20 nga 150 emigrantët e bllokuar në Katania, Siçili, që vijnë nga Eritrea do të strehohen në Shqipëri. Qeveria shqiptare ka vendosur, që vendi ynë, të jetë i pari që të japë ndihmesë në strehimin e tyre, duke pranuar një numër modest refugjatësh, për shkak edhe të kushteve ekonomike.

Vendimi është marrë si një shenjë për të ndihmuar Italinë, e cila ka pranuar qindra emigrantë shqiptarë, por edhe si mesazh ndaj vendeve të Bashkimit Europian. Megjithëse së shpejti emigrantët priten të mbërrijnë në Shqipëri, qeveria nuk bën me dije detaje se ku do të strehohen dhe sa do ti kushtojnë shtetit.

Të kontaktuar nga TV SCAN, përfaqësues zyrtarë të Ministrisë së Brendshme bëjnë me dije se ka një plan strehimi për pritjen e tyre, pasi të mbërrijnë në vendin tonë.

Kryeministri Edi Rama ka reaguar për herë të parë për këtë çështje, ku në një intervistë për “Corriere”, theksoi se vendimi nuk është tregti me BE për çështjen e integrimit, pasi të gjithë duhet të bëjnë pjesën e tyre në lidhje me këtë çështje.

Edhe Ministri i Jashtëm shqiptar, Ditmir Bushati e ka cilësuar këtë vendim si përgjegjësi për t’i “dhënë një dorë” Italisë, ndërsa ka bërë me dije se nuk duhet të ketë kampe refugjatësh. Zëvendëskryeministri italian Luigi di Maio ka bërë një paralajmërim të fortë se Italian të ndërpresë fondet për Bashkimin Evropian, nëse shtetet e tjera nuk i marrin emigrantët që janë bllokuar në borin e anijes “Diciotti” e ankoruar në një port të Sicilisë.

Aktualisht në Tiranë është një kamp ku strehohen refugjatët sirianë në Babrru, dhe një tjetër në Karreç, Manzë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.