Shqipëria ka kohë deri në tetor, Hahn: Kriza politike ka ndikuar vendet e BE, por opinioni mund të ndryshojë
Komisioneri për Zgjerimin i Bashkimit Europian është shprehur optimist se në tetor do të hapen negociatat për Shqipërinë dhe Maqedoninë e Veriut. Gjatë një konference për mediat në Bruksel, megjithatë Hahn e pranoi se kriza politike në Shqipëri ka ndikuar te opinion i disa prej vendeve anëtare.
I pyetur për situatën politike në vend dhe publikimin e përgjimeve nga gazeta gjermane, Bild, Hahn tha se preferon ta shikojë gotën gjysëm plot, ndërsa saktësoi se pesë prioritetet e vendosura për Shqipërinë janë plotësuar, duke përmendur ndër të tjera edhe suksesin e reformës në drejtësi.
Gjatë konferencës së përbashkët me George Ciamba, ministrin rumun për çështjet europiane, Hahn zbuloi se Gjermania, Franca dhe Danimarka janë skeptike për hapjen e negociatave dhe kërkojnë shtyrjen e tyre. Ndërsa ministri i Rumanisë George Ciamba, vendi i të cilit mban presidencën e radhës të Bashkimit Europian shprehu besimin se negociatat do të hapen në Tetor, për shkak të rezultateve të arritura nga Shqipëria dhe Maqedonia e Veriut.
Rama reagon në Twitter: “Lajm pozitiv nga Europa, negociatat në tetor”
Menjëherë pas konferencës për mediat të komisionerit për zgjerimin, Johannes Hahn, ka reaguar kryeministri Edi Rama në Twitter. “Lajm shumë pozitiv nga Europa në rrugën e çeljes së negociatave. Pavarësisht luftës pa limite të frontit politik të së keqes, që po bën çmos të sakatojë vendin në sytë e Europës, për të bllokuar negociatat me sharje, kërcënime, molotovë e përgjime baltosëse, Shqipëria po reziston”, shkruan Rama.
Më tej kryeministri shpreson se në tetor do të happen negociatat. “Ministrat e jashtëm të BE kanë miratuar në Luksemburg, kalimin tek kryetarët e shteteve të rekomandimit për Shqipërinë e Maqedoninë e Veriut, me synim muajin tetor. Le t’i rezistojmë deri në fund ofensivës së baltës dhe gurëve kundër Shqipërisë. Të gjithë bashkë në 30 qershor”, përfundon Rama në Twitter.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.