Shqipëria ka treg për “fintech” – Ndër vendet me potencialin më të madh në Europë
Teknologjia e avancuar financiare, e njohur ndryshe si Fintech, po ecën me ritme mjaft të shpejta në Europë, duke revolucionarizuar mënyrën se si në i përdorim bankat, se si ne i kursejmë paratë dhe duke ndryshuar rrënjësisht institucionet financiare.
Një raport i pak kohëve më parë vlerësonte se, investimet në start-up në sektor janë rritur me 41% gjatë 4 viteve të fundit, për një total prej 40 miliardë dollarësh. Në Europë ndërkohë, këtij trendi nuk kishte si t`i shpëtonte as Europa jug-lindore, ku sektori vlerësohet në 2.2 miliardë euro.
Paçka se për Ballkanin Perëndimor vlera kap shifrën e vetëm 92 milionë eurove, një raport i fundit i “equities.com” vlerëson se, Shqipëria është një ndër 10 vendet me potencialin më të madh për të investuar në Europë aktualisht.
“Peizazhi i sektorit Fintech në Shqipëri është ende i pazhvilluar. Pavarësisht kësaj, disa ndër bankat më të mëdha në vend janë në krye të kësaj loje duke hedhur në treg aplikacione mobile mjaft të sofistikuara. Kjo bën që të jenë të konkurrueshme në nivel global”, thuhet mes rreshtave.
Ndër të tjera në pjesën dedikuar vendit tonë thuhet se, brezi i ri është i mirë-edukuar, njeh mirë gjuhën angleze dhe i hapur ndaj inovacionit, çka e bën vendin tonë një target-grup të preferuar për produktet fintech. “Tregu atje është i vogël por i ka të gjitha cilësitë e nevojshme”, thuhet më tej.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.