Shqipëria, më shumë fonde IPA – Brukseli propozon rritje me 24% në buxhetin e ri, në 14.5 mld euro
Buxheti afat-gjatë i Bashkimit Europian parashikon një rritje të ndjeshme të fondeve IPA, e për rrjedhojë edhe për Shqipërinë, si një ndër vendet përfituese nga këto fonde. Kështu, gjatë periudhës 2021-2027 parashikohet që fondet IPA të prekin shifrën e 14.5 miliardë eurove.
Gjatë periudhës aktuale, pra atë 2014-2020, fondet IPA fiksohen në 11.7 miliardë euro.
Rritja fiksohet kështu në 23.9% çka përkthehet në një rritje domethënëse në letër, por ndoshta jo domethënëse në praktikë po të kemi parasysh faktin se gjatë kësaj periudhe parashikohet edhe vala e re e zgjerimit të unionit, me Serbinë dhe Malin e zi në pararojë për t`u anëtarësuar, dhe me Shqipërinë dhe Maqedoninë tashmë kandidate serioze.
Këto fonde janë mekanizmi i Bashkimit Europian për të financuar ndryshimin në vendet që janë kandidate për t`u anëtarësuar dhe ato potencialisht kandidate. Aktualisht, në skemën e këtyre fondeve përfshihen 6 vendet e Ballkanit Perëndimor dhe Turqia.
Brukseli zyrtar parashikon që edhe gjatë periudhës 2021-2027 vendet e sipërpërmendura do të asistohen nëpërmjet këtij mekanizmi, atij të pre-anëtarësimit, paçka se shumëkush kishte menduar për diçka më shumë. Fondet IPA projektohet kështu të zënë vetëm 1.27% të totalit të gjithë buxhetit të Bashkimit Europian gjatë kësaj periudhe kohore.
Gjatë periudhës 2014-2020 për Shqipërinë janë parashikuar 649 milionë euro fonde. Në rast se shpërndarja e parave në buxhetin e ri do të jetë e drejtë, atëherë Shqipëria pritet të përfitojë rreth 800 milionë euro.
Vetëm pak kohë më parë, ministri i jashtëm Ditmir Bushati i bëri apel Brukselit që të mendojë më shumë për vendet kandidate në buxhetin e ri afat-gjatë, pasi vullneti politik nuk mjafton për të integruar këtë pjesë të Europës.
Gjithsesi, më shumë sesa për sasinë e parave, duket se buxheti i ri do të ngjallë pakënaqësi më shumë për mënyrën sesi do vazhdojë të trajtohet rajoni. Buxheti i ri, tashmë vetëm në formën e një propozimi do të marrë aprovimin përfundimtar në muajin Maj të vitit të ardhshëm.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.