Shqipëria merr kryesimin e OSBE-së – Sllovakia i dorëzon Ramës në Bratislavë përgjegjësitë e reja
Shqipëria ka marrë ditën e premte zyrtarisht drejtimin e OSBE-së. Këtë gjë e ka deklaruar fillimisht Ministri në detyrë i Europës dhe Punëve të Jashtme, Gent Cakaj, i pranishëm në ministerialin e ministrave të jashtëm të Organizatës për Siguri dhe Bashkëpunim në Europë, në Bratislavë.
“Sot në Ministerialin e OSBE-së në Bratislavë Shqipëria zyrtarisht merr Kryesinë e OSBE-së. Pas një pune kapitale përgatitore në rrafshin politik e programatik, si dhe organizativ e logjistik, Shqipëria sot është krejtësisht e gatshme për të udhëhequr një Kryesi të besueshme, bashkëpunuese dhe efektive”-shkruan ministri i jashtëm në detyrë i vendit tonë në rrjetet sociale. Për kryeministrin Rama ndërkohë, marrja e kryesimit të kësaj organizate është një nder dhe përgjegjësi.
OSBE është organizata më e madhe në botë për çështjet e sigurisë, si dhe është avokate e çështjeve të tjera, si të drejtat e njeriut, liria e medias apo zgjedhjet e lira. Organizata ka 57 shtete anëtare dhe daton në vitin 1973. Shqipëria i është bashkuar në vitin 1991. Kryesimi i Shqipërisë do të zgjasë 1 vit, ndërkohë që vitin e ardhshëm ministeriali do të zhvillohet në vendin tonë. Deri më tani kryesimin e OSBE-së e mbante Sllovakia.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.