Shqipëria merr rekomandimin për hapjen e negociatave – Hahn: Rekomandimi i justifikuar nga reformat
Komisioni Europian i ka dhënë Këshillit të Europës rekomandimin zyrtar për nisjen e procesit të negociatave për anëtarësim për Shqipërinë dhe Maqedoninë.
Në deklaratën e saj pas takimit të Komisionit Europian mbi paketën e zgjerimit, Përfaqësuesja e Lartë e Unionit për Çështjet e Jashtme, Federica Mogherini, theksoi edhe njëherë se Ballkani Perëndimor i përket të ardhmes së Bashkimit Europian.
“Ky është momenti kur ne njohim ndryshim pozitiv në mënyrë që të bëhet progres drejt BE. Gjatë vitit të kaluar partnerët nga rajoni kanë bërë reforma shumë të rëndësishme dhe kanë modernizuar ekonomitë e tyre. Nga 6 ekonomi, 2 kanë progresuar mirë në bisedimet e anëtarësimit, pra Mali i Zi dhe Serbia. Sot Komisioni rekomandon që Këshilli Europian të hapë procesin e negociatve me Shqipërinë dhe Malin e Zi”, u shpreh Mogherini.
Komisioneri për Zgjerimin Johannes Hahn, u shpreh se rekomandimi vjen edhe si një lëvizje reciproke, pasi Shqipëria dhe Maqedonia kanë bërë detyrat e tyre.
“Sa i takon Shqipërisë, do të vijojmë me prioritetet kryesore të përmendura dhe më herët, administrata publike, krimi i organizuar, reforma gjyqësore dhe minoritetet. Sa i takon reformës në drejtësi kemi parë rezultate konkrete dhe të prekshme, por jemi në fillimin e këtij procesi shumë premtues, ndaj ky rekomandim është i justifikuar”, tha Hahn.
Dhënia e rekomandimit të pakushtëzuar pasohet nga një vizitë zyrtare dy ditore e Mogherinit në Tiranë, ditën e martë dhe të mërkurë.
Përfundimisht për hapjen ose jo të negociatave do të vendosë Këshilli i Europës në mbledhjen e radhës më 17 Maj, ku do të marrin pjesë edhe krerët e 6 vendeve të Ballkanit Perëndimor. Deri më këtë datë do të zhvillohet një proces i vështirë lobimi, pasi çdo shtet anëtar i BE mund të vendosë veton kundër nisjes së bisedimeve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.