Shqipëria mes vendeve në rrezik – Stacioni hapësinor kinez do të përplaset në Europë me copëza deri në 100 kg
Një stacion hapësinor me një peshë prej 8.5 ton, i cili ka qenë në një orbitë rënëse prej Marsit 2016, pritet të rihyjë në atmosferë vitin e ardhshëm.
Parashikimet e Agjencisë Europiane të Hapësirë (ESA) tregojnë se copëza metalike mund të bien në disa vende europiane si Spanja, Portugalia, Italia, Bullgaria, Greqia. Por të rrezikuara janë të gjitha vendet pranë paralelit 43 gradë, si Shqipëria, Kosova dhe Mali i Zi.
Hyrja në atmosferë e stacionit Tiangong-1 pritet të ndodhë mes Janarit dhe Marsit të vitit të ardhshëm, ndaj për ekspertët është ende e vështirë të përcaktohet me saktësi trajektorja që do të ndjekë.
ESA po e mban rastin në mbikëqyrje nga disa dhjetëra astronomë, për të bërë një parashikim të saktë, në mënyrë që të lajmërohen sa më parë autoritetet e vendit që do të jetë në rrezik.
Stacioni kinez i ashtuquajtur “Pallati Qiellor” ka një gjatësi prej 12 metrash dhe aktualisht po qarkullon Tokën në një distancë prej 300 kilometrash. Kur të hyjë në atmosferë pjesa më e madhe e tij do të digjet, por për shkak të përmasave, shkencëtarët thonë se me shumë gjasa copëza të mëdha me peshë deri në 100 kilogramë do të arrijnë të prekin tokën.
Megjithatë zyrtarët kinezë këmbëngulin se copëzat do të përbëjnë një rrezik shumë të vogël për njerëzit ose pronën.
“Bazuar në llogaritjet dhe analizën tonë, pjesët më të mëdha të stacionit hapësinor do të digjen gjatë rënies. Kina e ka vlerësuar gjithmonë menaxhimin e copëzave hapësinore duke kryer kërkime dhe testime në ndarjen e tyre dhe pastrimin”, tha Wu Pingnga Zyra e Inxhinierisë Hapësinore në Kinë
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.