Shqipëria ndërmerr një angazhim – Premtim në Bruksel, luftë shmangies së taksave brenda dy viteve
Këshilli për çështjet ekonomike dhe financiare të Bashkimit Europian ka publikuar listën e zezë me 17 vendet e konsideruara si parajsa fiskale ose bashkëpunuese me këto lloj juridiksionesh.
Më saktë kjo quhet si lista e vendeve jo bashkëpunuese sa i përket çështjeve të taksave.
Vetëm pak ditë më parë, një raport i Oxfam evidentonte qartë se, në rast se nuk do të kishte presione politike në bruksel, Shqipëria duhet të ishte një ndër 35 vendet që me patjetër duhej përfshirë në këtë listë.
Këshilli Europian siç e vërteton edhe lista zyrtare tashmë nuk e ka përfshirë Shqipërinë, por i jep një përgjigje arsyes së mospërfshirjes.
Vendi ynë, sëbashku me disa vende të ndryshme të globit, përfshirë disa prej fqinjëve tanë, është angazhuar që të marrë masa konkrete në drejtim të luftës ndaj evazionit fiskal dhe shmangies së taksave.
Bëhet fjalë për një standard ndërkombëtar që njihet si BEPS. Pra, Shqipëria sëbashku me Serbinë, Malin e Zi, Maqedoninë, Bosnje Hercegovinën dhe 8 juridiksione të tjera angazhohen që të përfshihen në kornizën përfshirëse anti-BEPS, pra kundër evazionit fiskal, deri në vitin 2019, thuhet në dokumentin e bërë publik nga Komisioni Europian.
Në këtë dokument vihet re gjithashtu se, vendet fqinje, si Serbia, Maqedonia, Mali i zi apo Bosnje Hercegovina kanë ndërmarrë edhe disa angazhime të tjera, që i janë kërkuar nga Brukseli.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.