Shqipëria në Panairin Mesdhetar të Turizmit Arkeologjik – Butrinti e Apollonia prezantohen në Realitet Virtual
Agjencia Kombëtare e Turizmit do të prezantojë ofertën kulturore të Shqipërisë në Panairin Mesdhetar për Turizmin Arkeologjik, i cili do të zhvillohet në Salerno të Italisë në datat 26-29 Tetor 2017.
Një risi në promovimin e sektorit është teknologjia “ArcheoVirtual”, e cila do të ofrojë përjetimin në realitet virtual të siteve si Butrinti, Apollonia, Bylisi, Finiqi, Dyrrahiumi, Antigonea dhe Amantia. Shqipëria do të përfaqësohet për herë të parë në këtë panair përmes një stende prej 6 metrash katrorë, të ofruar nga organizatorët.
Ky është një prej eventeve kryesore për të promovuar turizmin arkeologjik dhe ofron mundësi për takimin me biznese profesionale, tur operatorë, media të specializuara dhe turistë potencialë.
Panari zhvillohet në bashkëpunim me UNESCO dhe UNWTO, e do të ndiqet nga 10 mijë vizitorë, 100 pjesëmarrës nga 20 shtete të ndryshme, ndërsa do të zhvillohen dhe 70 konferenca e takime kokë më kokë.
Për Shqipërinë ky është një shans që të listohet në turet më të mëdha kulturore arkeologjike, duke shfrytëzuar edhe afërsinë me dy prej vendeve më të zhvilluara në këtë formë turizmi si Italia dhe Greqia.
Ture të tilla janë të frekuentuara më së shumti edhe nga turistët e vendeve aziatike, të cilët në vitin 2016 në vendin tonë ishin vetëm 37 mijë vizitorë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.