Shqipëria “në shifra”- Kujdesi shëndetësor, qarqet me numrin më të lartë të shtretërve spitalorë. Abortet, qytetet me koeficientin në rritje

Shëndeti është një përparësi e rëndësishme për qytetarët. Ata duan të mbrohen nga sëmundjet dhe kërkojnë të marrin shërbimet më të mira shëndetësore.

Sigurimi dhe shpërndarja e shërbimit të kujdesit shëndetësor publik në Shqipëri është e organizuar në dy grupe të mëdha: shërbimi i kujdesit shëndetësor parësor dhe shërbimi spitalor.

Shërbimi i kujdesit shëndetësor parësor është pika e parë e kontaktit të popullsisë për zgjidhjen e problemeve shëndetësore, ndërkohë që numri i shërbimeve dhe cilësia e ofrimit të tyre është rritur si në poliklinika, qendra shëndetësore dhe ambulanca.

Në një raport të fundit të INSTAT thuhet se numri më i madh i institucioneve në shërbimin e kujdesit parësor është përqendruar në qarqet ku dhe numri i popullsisë është më i lartë si: Elbasan, Korçë, Tiranë dhe Fier.

“Brenda qarkut, institucionet janë të përqendruara në qytetet të cilat konsiderohen si qendra të qarqeve, ku merr shërbim shëndetësor jo vetëm popullsia lokale por dhe të ardhur nga zonat përreth për një shërbim më të kualifikuar”, thuhet në raport.

Shërbimi spitalor

Ndërkohë shërbimi spitalor garanton shërbimin më të specializuar shëndetësor në të gjitha qarqet e vendit.

“Qarku i Tiranës ka numrin më të madh të shtretërve në vend, 2329 ndjekur nga qarku i Elbasanit, 1088. Numri i shtretërve spitalorë për 10 mijë banorë është më i lartë në Gjirokastër, Kukës dhe Dibër. Dendësia më e lartë e shtretërve spitalorë rezulton në qarkun e Gjirokastrës, 57 shtretër për 10 mijë banorë ndërsa më e ulëta në qarqet e Fierit dhe Durrësit, përkatësisht 21 dhe 19 shtretër për 10 mijë banorë”, thuhet në raport.

Abortet

Sipas të dhënave të INSTAT, në 5 vitet e fundit vihet re një ulje e ndjeshme e lindjeve shoqëruar dhe me ulje të numrit të aborteve gjithsej.

Numri më i lartë i aborteve regjistrohet në qarkun e Fierit, 553, Tiranës, 515 dhe Durrësit, 496. Në vitin 2016, raporti i numrit të lindjeve me abortet është 1 abort në 5,3 lindje.

“Raporti më i lartë i abortit regjistrohet në qarqet e Tiranës dhe Vlorës me përkatësisht 310 dhe 228 aborte për 1000 lindje të gjalla. Raportet më të ulëta të abortit regjistrohen në qarqet e Kukësit dhe Elbasanit dhe Fierit me përkatësisht 49, 71 dhe 88 aborte për 1000 lindje të gjalla. Numri i aborteve jo domosdoshmërisht shkon paralel me numrin e lindjeve të gjalla në secilin qark, kjo vihet re edhe në grafikun e mëposhtëm ku qarqet si Gjirokastra dhe Vlora kanë një numër lindjesh relativisht të ulët por një raport aborti të lartë. Mund të themi se e kundërta ndodh për qarqet e Tiranës dhe Elbasanit ku numri i lindjeve është i lartë por kjo nuk reflektohet tek raporti i aborteve”, thuhet në raportin e INSTAT.

Vdekjet

Në vitin 2016, numri i vdekjeve në Shqipëri llogaritet mbi 21 mijë, nga të cilat peshën më të madhe sipas shkakut të vdekjes e zënë sëmundjet e aparatit të qarkullimit të gjakut, që përbëjnë 51,7 % të numrit të vdekjeve gjithsej. “Në këtë vit, koeficienti sipas shkakut të sëmundjeve të aparatit të qarkullimit të gjakut është 38,4 vdekje për 10 mijë banorë. Qarku i Beratit ka koeficientin më të lartë specifik të vdekshmërisë së kësaj sëmundjeje, 49,8 vdekje për 10 mijë banorë ndjekur nga qarku i Gjirokastrës me 48,8 vdekje për 10 mijë banorë. Qarqet me numrin më të ulët të vdekjeve nga sëmundjet e aparatit të qarkullimit të gjakut për 10 mijë banorë janë Elbasani, Durrësi dhe Tirana”, thuhet në raport.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.