Shqipëria me më pak mirëqenie – Në vendin e 75-të në botë, për cilësinë ekonomike të 110-tët

Shqipëria renditet në vendin e 75-të në botë ndër 149 shtetet të ndryshme në indeksin e prosperitetit 2017, i publikuar nga Instituti Legatum. Ky indeks është ndër më prestigjiozët në kategorinë e atyre që masin zhvillimin dhe mirëqenien e një ekonomie dhe shoqërie të caktuar.

Në krahasim me një vit më parë rezulton se, vendi ynë ka humbur një pozicion në renditje. Në krahasim me rajonin, Shqipëria vijon të mbetet e fundit. Në krahasim me kontinentin ndërkohë është më mirë se Gjeorgjia, Bjellorusia, Ukraina, Moldavia dhe Rusia apo Turqia.

Indeksi i përgjithshëm përpilohet mbi bazën e 9 nën-indikatorëve të tjerë, si: ambienti i biznesit, cilësia e ekonomisë, qeverisja, shëndeti, arsimi, etj. Në atë të cilësisë ekonomike vendi ynë renditet në vendin e 110-të në botë, duke e vendosur në pozita aspak të favorshme.

Edhe në drejtim të kapitalit social, Shqipëria renditet e 119-ta në botë. Performanca më e dobët ndërkohë regjistrohet në drejtim të ambientit natyror, ku vendi ynë është i 125—ti në botë. Performanca më e mirë ndërkohë shënohet në drejtim të shëndetit dhe lirive personale, në vendin e 46-të dhe 47—të respektivisht.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.