Shqipëria paralajmëron masa mbrojtëse ndaj qumështit që importohet! Analizohet dëmi që i bëhet industrisë vendase, nis procedura hetimore
Shqipëria po shqyrton mundësinë e marrjes së masave që shkojnë në mbrojtje të prodhimit vendas të qumështit kundrejt atij që importohet. E në këtë rast, nuk përjashtohet mundësia që të ndalohet importi i qumështit nga vendet e tjera, përfshirë ato fqinje. Një nga vendet që mund të preket nga ky vendim më së shumti është Maqedonia.
Ajo që ka rezultuar nga një studim paraprak i tregut është se Shqipëria ka shënuar një rritje të konsiderueshme të importit të qumështit të përpunuar në periudhën 2011-2016 në një kohë që ka një sasi prej 1.1 milion tonë prodhim në vit, nga e cila vetëm 11.106 ton përpunohet. E nga kjo sasi e qumështit që prodhon, Shqipëria nuk arrin të eksportojë jashtë vendit për faktin se konsiderohet nga vendet e tjera se nuk përmbush standardet.
E në këtë rast, nuk përjashtohet mundësia që Shqipëria, në përfundim të hetimit që ka nisur, të ndërmarrë masë reciprociteti, raporton SCAN.
Komisioni ndërinstitucional për Vlerësimin e Masave për Importet që u drejtua nga ministrja e Zhvillimit Ekonomik Milva Ekonomi, ka zhvilluar mbledhjen e parë gjatë ditës së sotme . Referuar njoftimit zyrtar, kanë qenë sipërmarrësit vendas të sektorit që kanë sjellë fakte konkrete të dëmit që i bëhet industrisë vendase nga importi i qumështit UHT (Ultra High Temperature). Anëtarët e Komisionit u njohën me një prezantim nga Drejtoria e Mbështetjes së Sipërmarrjes në Ministrinë e Zhvillimit Ekonomik, lidhur me kërkesën e sektorit të Industrisë së përpunimit të qumështit, ku analiza për vlerësimin e dëmit që i bëhet industrisë vendase nga importi i qumështit UHT u bazua në disa faktorë:
1- Vëllimi i importeve, i cili ka pësuar një rritje të konsiderueshme prej 34 % në periudhën 2011-2016
2- Çmimin e importeve që ka ardhur duke u ulur nga viti në vit
3-Ndikimin e importeve te prodhuesit vendas. Konstatohet se në Shqipëri prodhohet një sasi e konsiderueshme qumështi për rreth 1.1 mln tonë në vit nga e cila vetëm 11.106 ton konvertohet në qumësht UHT.
4- Ndikimi që kanë skemat subvencionuese në këtë sektor në vendet e rajonit krahasuar me vendin tonë.
Në takim u kërkua që në mbledhjet e ardhshme të ketë pjesëmarrje si vëzhgues edhe nga INSTAT dhe Drejtoria e Ndihmës Shtetërore. Në këtë komision gjithashtu synohet të diskutohen dhe analizohen mundësitë për të iniciuar marrëveshje të reja të tregtisë së lirë me vende të tjera.
Komisioni për Vlerësimin e Masave për Importet ka në përbërje të tij veç përfaqësuesve të Ministrisë së Zhvillimit Ekonomik, edhe përfaqësues nga Ministria e Bujqësisë, Ministria e Jashtme, Ministria e Financave, Unioni i Dhomave të Tregtisë dhe Industrisë, si dhe nga Drejtoria e Përgjithshme e Doganave.
Ky komision ka si qëllim të adresojë gjithë problematikat që hasen në fushën e importeve mes vendit tonë dhe vendeve të tjera si dhe marrjen e masave mbrojtëse për industrinë prodhuese vendase nga praktikat e importeve të dumpuara apo të subvencionuara. Komisioni është ngritur në bazë të Ligjit nr. 9790 datë 19.07.2007 “Për masat mbrojtëse në importe” dhe të ligjit nr. 9796 datë 23.07.2007 “Për masat antidumping dhe kundërbalancuese”.
Ndërkohë, nuk përjashtohet mundësia që një diskutim i tillë të ndërmerret edhe për sektorë të tjerë si në rastin e prodhimit bujqësor vendas.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.