Shqipëria prezanton paketat turistike në Panairin e Utrecht në Holandë
Shqipëria për herë të parë është pjesë e panairit ndërkombëtar të turizmit në “Vakantiebeurs” Utrecht (Holandë), që zhvillohet nga data 10-15 Janar.
Qëllimi kryesor i këtij panairi është prezantimi i paketave turistike përballë turistëve, në një nga tregjet më të mëdha në botë që udhëtojnë jashtë vendit të tyre, siç është ai holandez ( i 5-ti pas Gjermanisë, SHBA-së, Britanisë së Madhe dhe Francës).
Në fokus të veçantë janë kontaktet biznes- biznes dhe biznes- konsumator, mes Shqipërisë dhe Holandës.
Ministria e Zhvillimit Ekonomik, Turizmit, Tregtisë dhe Sipërmarrjes, nëpërmjet Agjencisë Shqiptare të Zhvillimit të Investimeve (AIDA), në bashkëpunim me Ambasadën e Shqipërisë në Holandë, prezanton Shqipërinë turistike bashkë me 3 tur- operatorë turistikë, të cilët në bazë të një axhende, do të asistohen në takime të ndryshme, të organizuara nga përfaqësia diplomatike në Holandë.
Referuar njoftimit zyrtarë të Ministrisë së Zhvillimit Ekonomik, gjatë ditëve të këtij panairi është parashikuar edhe një forum biznesi dhe takime me investitorë të ndryshëm, ku Agjencia Shqiptare e Zhvillimit të Investimeve AIDA, do të shpalosë potencialet për investime që ka Shqipëria, jo vetëm në fushën e turizmit, por edhe në sektorët e tjerë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.