Shqipëria, progres me shëndetin – Raporti i “The Lancet”, vendi i 43-të në botë ndër 188

“The Lancet” është një prej revistave më të vjetra dhe ndër më prestigjiozet në botë për mjekësinë. Së fundmi, revista ka publikuar një raport të zgjeruar, që ka për qëllim të masë progresin e një vendi drejt objektivave të qëndrueshëm për vitin 2030 të Kombeve të Bashkuara në drejtim të shëndetit.

Për këtë arsye, në raport kanë marrë në analizë 37 nën-indikatorë të atyre që njihen si SDG, pra objektivat e zhvillimit të qëndrueshëm.

Çuditërisht, Shqipëria renditet e 43 në botë, ndër 188 shtete, duke lënë pas me radhë të gjitha vendet e tjera të rajonit, por edhe vende të tjera europiane. Indeksi në fjalë është përpiluar mbi të dhënat historike, në harkun kohor 1990-2016 për secilin prej vendeve të ekzaminuara.

Raporti në fjalë është financuar nga një prej fondacioneve më në zë në botë, ai i “Bill dhe Melinda Gates”. Raporti jep një pikëzim për secilin prej këtyre 37 nën-indikatorëve që janë edhe pjesë e axhendës së Organizatës së Kombeve të Bashkuara deri në vitin 2030.

Vendet anëtare të organizatës janë angazhuar që të përmbushin këto 17 objektiva parësorë si dhe 169 objektivat dytësorë që rrjedhin. Ndër to, 50 i referohen pikërisht shëndetit.

Shqipëria regjistron performancën më të dobët në nën-indikatorin që i referohet mbipeshës te fëmijët, atij të vdekjeve nga ndotja e ajrit si dhe atij që i referohet planifikimit familjar dhe metodave moderne të kontraceptivëve

Pa llogaritur këto nën-indikatorët ku Shqipëria grumbullon pikët maksimale, 100 të tilla, duke qenë s i referohen sëmundjeve si HIV-Aids, malarja, konflikteve, etj, vendi ynë performon mirë, edhe në atë që i referohet mbulimit me vaksinim, parandalimit të dhunës dhe higjienës.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.