“Shqipëria, qendër rajonale energjie”. Skavica dhe TEC-i i Vlorës, Jaço: Të tjera investime amerikane nëse adresohen reformat

Skavica dhe TEC-i i Vlorës e kthejnë Shqipërinë në qendër rajonale energjie”. Deklarata është bërë nga presidenti i Dhomës Amerikane të Tregtisë, Enio Jaço, në Forumin Ekonomik të Tiranës, gjatë diskutimit me Anëtarin e Lartë të Këshillit të Atlantikut, Damir Marusic mbi “Marrëdhëniet SHBA-Shqipëri në Administratën Biden”. Sipas tij, pas dy projekteve strategjike të Skavicës dhe TEC-it të Vlorës, investimet amerikane mund të behën afatgjata dhe dominuese nëse adresohen reformat e duhura. Po ashtu, Jaço deklaroi se mbrojtja, çështjet e sigurisë, demokracia dhe biznesi vijojnë të jenë tre prioritetet kryesore në fokus të Shtëpisë së Bardhë përsa i përket politikave në vendet e Ballkanit Perëndimor përfshirë dhe Shqipërinë.

 “Ky është një prioritet i ri dhe synon një lidhje më të fortë tregtare ShBA-Shqipëri, më shumë investime amerikane, më shumë tregti, etj. Kjo është optimiste sepse kurrë më parë nuk është ngritur në një nivel kaq të lartë të politikave. Dhe ka pasur rezultate të forta në një periudhë afatshkurtër. Vitin e kaluar Shqipëria dhe SHBA nënshkruan Marrëveshjen me te rëndësishme Ekonomike pas 90-ës, i cili përfshin ndërtimin e një projekti të madh hidroenergjitik dhe ditët e fundit kemi dhe finalizimin e një marrëveshje me ExxonMobile për ndërtimin e një termocentrali ne Vlore per gazin e lëngshëm natyror”.

Ndërkaq, sa i takon klimës së biznesit, Jaço tha se ajo ka nevojë për përmirësim.

“Përparimi i bërë me këto investime do të jetë jetëshkurtër nëse Shqipëria nuk adreson korrupsionin. Kjo çështje është e lidhur me demokracinë dhe sundimin e ligjit, që janë pjesë themelore e prioriteteve të politikës Amerikanë në Shqipëri. Përparimi në këtë drejtim do të përcaktojë suksesin afatgjatë të agjendës së biznesit dhe të vetë prioriteteve”.

Që prej ndërtimit të tij, TEC-i Vlorës nuk është vënë në punë për shkak të problemeve teknike, ndërkohë që shfrytëzimi i gazit shihej si e vetmja mundësi për ta vënë në punë këtë vepër elektroenergjetike.

Ola Mitre / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.