Shqipëria s’bën dot ekstradimet – Kriza e Gjykatës së Lartë, KLGJ “merr borxh” Gjyqtarë të përkohshëm nga apelet

Dalja tërësisht jashtë funksionit të Gjykatës së Lartë prej procesit të Vetting-ut e ka detyruar Këshillin e Lartë Gjyqësor të gjejë rrugë alternative për të mbuluar së paku ato çështje që nuk mund të persin asnjë ditë përtej afateve, sic janë ekstradimet dhe transferimet  e personave të dënuar.  Përmes një vendimi që mban datën 23 korrik, KLGJ ka kryer disa modifikime në rregulloren e caktimit të gjyqtarëve për çështjeje të veçanta në gjykata të tjera.  Vendimi mundëson dërgimin e gjyqtarëve të apeleve për të kryer funksionet e anëtarëve të Gjykatës së lartë deri në krijimin e një trupe gjyqësore te kjo e fundit.

“Nevoja të Gjykatës së Lartë” në kuptim të këtij vendimi konsiderohen vetëm ato që lidhen me gjykimin e çështjeve gjyqësore që kanë të bëjnë me marrëdhëniet juridiksionale me autoritetet e huaja, ekskluzivisht me ekstradimin dhe transferimin e personave të dënuar, për të cilat shkronja “c”, pika 3, e nenit 462 të Kodit të Procedurës Penale parashikon që vendim i formës së prerë dhe i ekzekutueshëm është vendimi i Gjykatës së Lartë.

Gjyqtarët që caktohen në Gjykatën e Lartë për çështje gjyqësore të veçanta, përzgjidhen, me short, ndërmjet gjyqtarëve të gjykatave të apelit, të cilët kanë të paktën 13 vjet përvojë në ushtrimin e profesionit, si dhe kanë kaluar me sukses procesin e rivlerësimit kalimtar sipas ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, thekson vendimi i KLGJ.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.