Shqipëria udhëheq rajonin – Raporti i Institutit të Vienës, në tre vite të parët me rritjen dhe papunësinë

Këtë vit, atë të ardhshëm si dhe në 2020, Shqipëria do të jetë ekonomia me rritjen më të shpejtë në Ballkanin Perëndimor, thotë Instituti i Vienës për Studime Ekonomike në një raport të publikuar së fundmi për Europës Qendrore dhe Lindore. Për këtë vit, Instituti i Vjenës, projekton një rritje ekonomike të vendit tonë në 4.1%, ndërsa për vitin e ardhshëm në 4%, për të zbritur më pas në 3.9% në 2020.

Projeksionet e reja shënojnë një zhvlerësim të ekonomisë shqiptare. Në raportin e  kaluar vlerësohej se, ekonomia e vendit tonë do të rritej me  4.2% këtë vit dhe 4.1% vitin e ardhshëm. Pra, kemi të bëjmë me një zhvlerësim minimal të projeksioneve, me vetëm 0.1%. Edhe sa i përket normës së papunësisë, projeksionet më të fundit tregojnë se, Shqipëria do të jetë ajo me normën më të ulët këto tre vite, me 13%, 12.5% dhe 12% respektivisht.

Pavarësisht optimizmit të Institutit të Vienës sa i përket indikatorëve kyç makro-ekonomikë, një rënie e papunësisë me vetëm 0.5% në një vit është minimale. Sa i përket normës së inflacionit ndërkohë, projeksionet mbeten të pandryshuara. Instituti i Vienës është i radhës ndër institucionet prestigjioze që ka tentuar të shfryjë disi optimizmin e tepruar sa i përket rritjes ekonomike të vendit tonë.

Tërheqja e investimeve të huaja madhore dhe mosafrimi i investimeve të reja do të prodhojë për rrjedhojë një ngadalësim të hapit të rritjes, duke i`u larguar kështu objektivit të shumë kërkuar të qeverisë, në të paktën 5%  rritje ekonomike, që sipas ekzekutivit do të kishte impakt të drejtpërdrejtë në xhepat e qytetarëve.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.