Shqipëria “vuan” nga shqiptarët – Progres në “indeksin e prosperitetit 2018”, por “zhytet” kapitali njerëzor
Shqipëria ka bërë progres të ndjeshëm në drejtim të prosperitetit. Vendi ynë renditet në pozicionin e 64-të në botë ndër 149 shtetet të ndryshme në “Indeksin global të prosperitetit 2018”, i publikuar nga Instituti Legatum.
Një vit më parë mbante pozicionin e 75-të, çka përkthehet në një përmirësim me plot 11 vende në renditje. Ky indeks është ndër më prestigjiozët në kategorinë e atyre që masin zhvillimin dhe mirëqenien e një ekonomie dhe shoqërie të caktuar. Pavarësisht progresit në renditje, në krahasim me rajonin, Shqipëria vijon të mbetet e fundit.
Në krahasim me kontinentin ndërkohë është më mirë se Gjeorgjia, Bjellorusia, Ukraina, Moldavia dhe Rusia apo Turqia. Indeksi i përgjithshëm përpilohet mbi bazën e 9 nën-indikatorëve që vlerësohen si kyç për të matur nivelin e prosperitetit të një shoqërie, si: ambienti i biznesit, cilësia e ekonomisë, qeverisja, shëndeti, arsimi, niveli i zhvillimit të një shoqërie, etj.
Në atë të cilësisë ekonomike, vendi ynë renditet në vendin e 109-të në botë, duke u vendosur në pozita aspak të favorshme, dhe duke lëvizur me vetëm 1 pozicion në krahasim me vitin e kaluar. Sa i përket ambientit të biznesit, Shqipëria renditet e 59-ta në botë, në pozita relativisht të mira në rajon. Performanca më e keqe ndërkohë vjen në drejtim të kapitalit social, që na rendit të 126-tët në botë, nga vendi i 119-të i vitit të kaluar.
Ky nën-indikator mat jo vetëm marrëdhëniet personale dhe shoqërore, por edhe normat shoqërore të një vendi si dhe pjesëmarrjen civile në mbarëvajtjen e vendit. Në Europë, vetëm Greqia duket se është më keq se ne në këtë drejtim. Të gjitha këto, në Shqipëri duket se shumëzohen me zero duke bërë që prosperiteti i vendit të vlerësohet si ndër më të ultë në Europë. Performanca më e mirë ndërkohë shënohet në drejtim të lirive personale dhe shëndetit. Në nivel global, Norvegjia është e para në renditje ndërsa Afganistani mban vendin e fundit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.