Shqiptarë nuk “preferojnë” sigurimin e shëndetit – 7% rënie për vitin 2019
Viti i kaluar shënoi një tjetër hap mbrapa për produktet e sigurimit vullnetar. Përveç sigurimit të fatkeqësive, rënie pësuan edhe primet e sigurimit të shëndetit.
Sipas të dhënave nga Autoriteti i Mbikëqyrjes Financiare, vlera e primeve të paguara për sigurimin e sëmundjeve për 11-mujorin ra me 7% krahasuar me të njëjtën periudhë për të një vit më parë. Shqiptarët shpenzuan për të siguruar shëndetin 566 milionë lekë ose rreth 4.6 milionë eurove. Kjo shifër përbën më pak se 4% të primeve totale të sigurimit.
Sigurimi i sëmundjeve ofrohet nga pesë prej kompanive të sigurimit të jo-jetës dhe njohu rritje të vazhdueshme deri në vitin 2017. Por, në dy vitet e fundit interesi për këtë produkt është në rënie. Për vitin e kaluar, primi mesatar vjetori paguar për të siguruar shëndetin nga sëmundjet ishte rreth 200 lekë për frymë.
Rënia e sigurimit të shëndetit dëshmon se tregu shqiptar ngelet mjaft i vështirë për sigurimet e mirëfillta vullnetare. Ky produkt është promovuar kryesisht nga bizneset në formën e paketave të benefiteve për punonjësit, si një mundësi për t’iu dhënë akses në shërbimet shëndetësore private. Por, as mundësia për shërbime shëndetësore me cilësi më të mirë nuk duket se është incentivë e mjaftueshme për rritur tregun e këtij produkti. Rënia e sigurimeve të shëndetit ndikon negativisht edhe spitalet e klinikat private, po të kemi parasysh se një pjesë e shërbimeve të tyre mjekësore paguhen nga siguruesit. Për 11 mujorin e vitit të kaluar, dëmet e paguara për sigurimin e sëmundjeve kishin vlerën e 3.2 milionë eurove, në rënie me 7% krahasuar një vit më parë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.