Shqiptarët, $53 mijë pasuri për frymë – “BB” publikon matësin e ri, shkojmë në kah të kundërt me globin
Pasuria e shqiptarëve, për frymë, fiksohet në rreth 53 mijë dollarë, thotë një studim i fundit i Bankës Botërore. Raporti me titull: `ndryshimi i pasurisë së kombeve 2018`, është i pari në llojin e tij dhe vjen në kuadër të debatit të gjerë që ka pushtuar globin se, a duhet të jetë PBB matësi real i zhvillimit. Për këtë arsye institucione të ndryshme kanë përpiluar metodologji të ndryshme për të matur nivelin e zhvillimit të një shoqërie.
Forumi Ekonomik Botëror ishte i pari që e bëri diçka të tillë, me indeksin e zhvillimit të përfshirë. Tashmë, duket se, edhe Banka Botërore i ka hyrë kësaj gare. Në tërësi, raport i fundit i Bankës Botërore thotë se, ndërkohë që në 20 vitet e fundit, pasuria globale është rritur me rreth 66%, ajo për frymë ka pësuar rënie, me rreth 31%.
Por, ky nuk është rasti i Shqipërisë, pasi vendi ynë klasifikohet mes atyre ekonomive ku pasuria për frymë është rritur në masën 50%-100% dhe këtë e ilustron harta. Në Europë, vendet që kanë parë pasurinë e tyre deri në dyfishim gjatë 20 viteve të fundit numërohen me gishtat e dorës, dhe Shqipëria është një prej tyre. Të dhënat e marra në analizë I referohen viteve 1995-2014.
Pasuria e një Shqiptari vlerësohet kështu në $53,107 për frymë. Kjo pasuri ndahet si vijon: $18.000 kapital i prodhuar, $13.000 kapital natyror, dhe $22.000 kapital njerëzor. Ndërkohë që në vendet e zhvilluara, kapitali njerëzor zë mbi 70% të pasurisë totale për frymë, në vendet në zhvillim kjo nuk vlen. Në Shqipëri, kapitali njerëzor zë 41.5% të totalit të pasurisë, pra rreth 30 pikë përqindje nën nivelin e vendeve të zhvilluara.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.