Shqiptarët kryesojnë listën e klandestinëve të kapur në Britani. “Home Office” publikon skemën që ndiqet
Shqiptarët përbëjnë shumicën e emigrantëve klandestinë që janë kapur nëpër portet e Britanisë së Madhe. Janë 981 shqiptarët, të cilët janë zbuluar nga autoritetet vendase duke hyrë ilegalisht nga viti 2008 deri në pranverën e 2016-ës. Të dhënat janë lëshuar nga “Home Office” (departamenti që merret me punët e brendshme, rendin, emigracionin) në kuadër të aktit për lirinë e informimit.
Sipas “The Guardian”, mafia shqiptare njihet nga policia britanike si trafikues të pamëshirshëm njerëzish dhe droge.
Ndërkohë, grupi i dytë më i madh për të njëjtën periudhë kohore me 425 të kapur është nga Afganistani, ndjekur nga Algjeria (425), Irani (348) dhe India (322). Kështu rezulton se emigrantët nga Shqipëria që mbërrijnë në ishull, përbëjnë së paku dyfishin e çdo grupi tjetër.
Shumica e emigrantëve ilegalë kapen para se të mbërrijnë në Mbretërinë e Bashkuar, nëpër kamionë në Calais ose në porte të tjera në Europë, ku bëhet kontrolli me rreze X për të gjetur klandestinë.
Pikërisht në Calais, qytetin francez pranë ngushticës me Anglinë, policia përmbylli të martën një operacion që kishte të bënte me trafikimin e emigrantëve shqiptarë.
Pesë menaxherë hoteli të dyshuar si pjesë e rrjetit të trafikimit të shqiptarëve në Britani u arrestuan nga policia franceze.
Katër hotele përdoreshin në këtë zonë, për të strehuar shqiptarët, para kalimit të tyre për në ishull.
Rrjeti u ofronte garanci kalimi vetëm shqiptarëve, duke u marrë nga 5 mijë deri në 10 mijë euro për person. Në një dhomë të këtyre hoteleve mund të strehoheshin deri në shtatë persona, ndërsa menaxherët edhe shisnin rrobat e emigrantëve pas largimit të tyre.
Sipas të dhënave të “Home Office”, mes të kapurve, shpesh kishte edhe gra shtatzëna. Tentativat për të kaluar përmes porteve dhe trenave u rritën nga 1 mijë tentativa në muaj në 2008, në gati 13 mijë në muaj për vitin 2015.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.